Qazaqstan Respýblıkasy Parlamenti Senatynyń Tóraǵasy Qasym-Jomart Toqaev Máskeýde Eýrazııa elderi Parlamentteri spıkerleriniń Birinshi keńesiniń aıasynda Iran Parlamentiniń Tóraǵasy Alı Larıdjanımen kezdesti, dep habarlady Qazaqstan Respýblıkasy Parlamenti Senatynyń baspasóz qyzmeti
Júzdesýshiler Prezıdent N.Nazarbaevtyń taıaýda Iranǵa barǵan resmı saparynyń erekshe mańyzyn jáne onyń barysynda saýda-ekonomıkalyq saladaǵy iri ýaǵdalastyqtarǵa qol jetkenin atap ótti. Árqashan dostyq pen ózara qoldaý rýhynda damyp kele jatqan Qazaqstan men Iran qatynastary qazirgi kezde jańa satyda óristeý ústinde.
Tóraǵalar terrorlyq uıymdar áreketiniń údeı túsýine baılanysty aımaqtyq qaýipsizdiktiń ózekti máselelerin talqylady. Ekstremızmmen kúreste aımaq elderiniń úılesimdi is-qımylynyń qajettigi atap ótildi. Q.Toqaev Iran parlamentshilerin 31 mamyrda Astanada bolatyn «Dinder terrorızmge qarsy» konferensııasyna qatysýǵa shaqyrdy.
Sol kúni Senat Tóraǵasy Q.Toqaev Reseı Federasııasy Federaldyq Jınalysy Federasııa Keńesiniń Tóraıymy Valentına Matvıenkomen kezdesti. Taraptar parlamentaralyq yntymaqtastyqtyń qazirgi jaǵdaıy, aımaqtyq yqpaldastyq úderisteri jáne álemdegi ahýal týraly pikir almasty. 11 mamyrda Federasııa Keńesi Tóraıymynyń Qazaqstanǵa resmı sapary bastalady.