QOSTANAI. 21 sáýir. Qostanaı oblysynda 1941-1945 jyldary Uly Otan soǵysynda halqymyzdyń kórsetken erligine, maıdan dalasynda qalǵan, jaraly bolyp kelip, soǵystan keıingi jyldary qaıtqan jaýyngerler rýhyna taǵzym etý maqsatynda «Máńgi tiri polk» qurylady. Bul týraly Qostanaı qalalyq ákimdiginiń baspasóz qyzmetine silteme jasaǵan egemen.kz tilshisi habarlady.
Uly Otan soǵysyna qatysqan, maıdan dalasynda qaza tapqan jáne búginde dúnıeden ótken soǵys ardagerleriniń urpaqtary atalarynyń, ájeleriniń portreti salynǵan shtender daıyndap jatyr. Olar 9 mamyr Jeńis kúni tańerteńgi saǵat 9.00-dan «Máńgi tiri polk» Qostanaı qalasyndaǵy ortalyq alańynan Jeńis saıabaǵyna deıin kóshelermen júrip ótedi. Bul erlikke taǵzymnyń, Otanǵa súıispenshiliktiń, ımandylyqtyń kórinisi bolmaq. Odan ári qaraı Jeńis kúni saltanaty atalǵan saıabaqtaǵy áńgilik ot pen dańq memorıalyna gúl shoqtaryn qoıýmen jalǵasady.
«Máńgi tiri polk» qurýdy osydan birneshe jyl buryn «Nur Otan» partııasynyń oblystyq fılıaly bastaǵan bolatyn. Olar osy jaqsy dástúrdi bıyl da jalǵastyrady.
Názıra Járimbetova.
Derek, foto: Qostanaı qalalyq ákimdiginiń baspasóz qyzmeti.