QOSTANAI. 21 sáýir. Qostanaı oblysynyń delegasııasy Tatarstan respýblıkasynda bolyp qaıtty. Delegasııa quramynda «Tobol» áleýmettik kásipkerlik korporasııasy ókilderi, iri ónerkásip jáne aýyl sharýashylyq kásiporyndarynyń jetekshileri, Qazqstaqstan halqy assambleıasynyń oblystyq fılıal músheleri boldy. Bul týraly Qostanaı oblystyq ákimdiginiń baspasóz qyzmetine silteme jasaǵan egemen.kz tilshisi habarlady.
Eki kúndik saparda oblys ákimi Arhımed Muhambetov bastaǵan delegasııa músheleri Tatarstan halqy dostyq úıinde qazaqtardyń ulttyq-mádenı avtonomııasy aktıvterimen kezdesti. Tatarstanda 1800 qazaqtar turady, taǵy 800 qazaqstandyq stýdent Qazandaǵy joǵary oqý oryndarynda bilim alyp júr.
Oblys ákimi Arhımed Muhambetov: «Osy saparymyzda áleýmettik-ekonomıkalyq máseleler eki jaqtyń jetekshilerimen, bıznes qoǵamdastyǵymen talqylandy. Delegasııa, ózim úshin de Qazandaǵy otandastarymyzben kezdesý úlken mańyz alady. Biz Tatarstanmen bizdiń oblystaǵy tatar dıasporasymen tyǵyz baılanys ornatamyz», – dedi. Arhımed Muhambetov 2017 jyly respýblıkalyq sabantoıdy Qostanaı oblysynda Tatarstan delegasııasynyń qatysýymen ótkizýdi usyndy. Bul usynys oblys ákimi men Tatarstannyń prezıdenti Rýstam Mınnıhanov arasynda bolǵan áńgimede taǵy da qaralyp, qoldaý tapty.
Qazaqstan men Tatarstandaǵy dıasporalar arasyndaǵy óz ara qarym-qatynastyń damýyn, olardyń atamekenimen baılanysynyń úzilmeýin Qazandaǵy dostyq úıiniń dırektory Irek Sharıpov te qoldady.
Irek Sharıpov: «Qazaq dıasporasy bizde úlken bedelge ıe. Dostyq úıi Nursultan Nazarbaev atyndaǵy kóshede tur. Munda qazaqtardyń úlesi úlken», – dedi.
Názıra Járimbetova.
Derek, foto: Qostanaı oblysy ákimdiginiń baspasóz qyzmeti.