Oqyrman
...batasyn beredi
Otadan keıin jaǵdaıym jaqsardy
Men oblystyq onkologııalyq dıspanserge túsip, sóıleı almaı, tipti, aıaǵymnan júre almaı qatty qınaldym. Altyn qoldy otashy, medısına ǵylymdarynyń kandıdaty Taıman Amanovtyń jasaǵan otasynan keıin jaǵdaıym túzelip, qazir táýirmin. Eki aptadan asa ýaqyt dıspanserde jatqanda baıqaǵanym – mundaǵy dárigerler senbi, jeksenbi kúnderi de tynymsyz eńbek etip, shuǵyl otalar jasalyp jatady. Aýrýhananyń bas dárigeri Esengeldi Rabaev ta óte elgezek azamat eken. Eki aptanyń ishinde kóptegen adamdar aman-esen úılerine qýanyp ketip jatqanyna kýá boldym. Osyndaı kásibı deńgeıi joǵary, aq adal júregimen jáne shyn nıetimen dimkás jandarǵa ekinshi ómir syılap, ajaldan arashalap júrgen aq jeleńdi abzal jandarǵa rızashylyǵymyz sheksiz. Men olardyń bárine ákelik jáne atalyq aq batamdy beremin.
Marat TASIMOV,
eńbek ardageri
Batys Qazaqstan oblysy,
Bórli aýdany
...maqtan tutady
Aqsaqaldar aýyl qazynasy
Bizdiń elimiz – ejelden erkindik ańsap, eli men jeri úshin sansyz shaıqasqa túsken erlerdiń mekeni. Solardyń biri Raıymbek aýdanyna qarasty Saryjaz aýyly. Sondaǵy Joldybaı taýynyń bókterindegi Kómirshi aýylynda men de týyp óstim.
Aıtaıyn degenim, ómir kórgen, tájirıbesi mol, keıingi urpaqqa aıtary bar, aqyly darııa aýylymnyń qarııalaryna arnaıy baryp, qoldaryn alyp sálemdesip, olarmen arqa-jarqa shúıirkelesip, ata-anamnyń kózin kórgender solar jaıynda estelikter aıtqanda bir tebirenip, tóbem kókke jetip jadyrap qalamyn.
Qazirgi tańda el aǵalary, aýyl jastary men aýyldyń uıytqysy bolǵan atalarymyz ben ájelerimiz qulshylyq jasaý úshin úıde oqylǵan namazǵa qaraǵanda, meshitte oqyǵan namazdyń saýaby mol dep, juma namazdaryn qaza etpeı meshitke qaraı asyǵyp kelip oqyǵanyn durys sanaıdy. Kárisi bar ma, jasy bar ma solardyń árqaısysyna qarap oı saralaǵanmyn, eliktegenmin, jaqsylyǵyn úırenip, jamandyǵynan jırengenim arqyly men olarǵa qaryzdarmyn.
Erbol SPATAEV
Almaty oblysy
...qynjylysyn jetkizedi
Qarttarǵa qamqorlyq qajet
Búkil ǵumyrym medısına salasynda ótkendikten búgindegi densaýlyq saqtaý salasyndaǵy keıbir keleńsizdikterdi kórip, kóńilim ortaıyp qalady. Máselen, áýeli dollar baǵamy ósti degen jeleýmen dári-dármek qymbattap ketti. Kóptegen adamdar sozylmaly aýrý túrlerimen aýyrady. Olar dáriger belgilegen dárilerdi únemi iship júrýi kerek, mundaı dárilerdiń baǵasy qymbat. Al aýrýhanalarda naýqastarǵa qoljetimdi baǵadaǵy dáriler ǵana tegin bosatylady. Qymbat dárilerdi zeınetaqysy 30-40 myń teńgeden aspaıtyn qarttar qalaı satyp alady? Sozylmaly naýqasy barlar jylyna eki-úsh ret aýrýhanada emdelip shyǵýy tıis. Aýrýhanaǵa jatqan soń dáriger eki-úsh dári belgilep, sonymen shekteledi. Aýrýyńdy basý úshin eń qajet dárilerdi óziń satyp alasyń.
Damyǵan 30 eldiń qataryna qosylamyz deımiz. Oǵan múmkindik te bar. Osyndaı mol múmkindik ıesi retinde eń birinshi kezekte basty baılyǵymyzdy saqtaýǵa keńirek kóńil bólinse eken deımin. Zeınetkerler zaryqpasa, qarttar qajymasa degen tilek bar.
Kamal KARAEV,
zeınetker-dáriger
ShYMKENT
...úlgi etedi
Serpindikter serpiltedi
Men Arqalyq memlekettik pedagogıkalyq ınstıtýtyna «Máńgilik el ındýstrııaǵa! «Serpin-2050» áleýmettik jobasy aıasynda pedagogıka jáne psıhologııa mamandyǵy boıynsha oqýǵa qabyldanyp, belsendi jastar «Jas serpin eriktiler» jańa uıym jumysyn bastap kettik. Jastardyń quqyǵyn qorǵaý, bos ýaqytyn tıimdi ótkizýdi uıymdastyrý, muqtaj jandarǵa jáne ardagerlerge kómek berýdi basty maqsat etip ustandyq. Biz bolashaq ustaz ekenimizdi maqtan tutyp, jas urpaq boıyna bilim nárin sińirý úshin árkez izdenip júrý kerektigin umytpaýdy, bilim alýmen qatar belsendi bolýdy uıymnyń uranyndaı sezinemiz.
Elimizdegi daǵdarysqa qaramastan, bizge osyndaı jaǵdaı jasaǵan memleketke alǵys aıtamyz. Bizdiń qatarymyzdan kóriný ár jastyń armanyna aınalmaq. Osy jobaǵa qatysqan jastardyń bilimge degen qushtarlyǵy de erekshe. Al biz el senim artar jalyndy jastarmyz.
Janserik BÁIDENOV,
Y.Altynsarın atyndaǵy Arqalyq memlekettik pedagogıkalyq ınstıtýtynyń stýdenti
Qostanaı oblysy
...kómek suraıdy
Qyzymnyń qos kózi kórmeı qaldy
aǵdyrdyń salǵan isine kónbeske shara joq. Tórt jasar qyzym Káýsar Qaıyrbekovanyń qos kózi birdeı tórt aılyǵynda alǵan ekpeniń saldarynan múldem kórmeı qaldy. Perzentimniń beli besikten shyqpaı jatyp qos janarynan birdeı aıyrylǵanyn bilgende janymdy qoıarǵa jer tappadym... Kórshiles Orynbor qalasynda akademık S.Fedorov atyndaǵy kóz aýrýlaryn emdeıtin klınıka bar. Munda mamandanǵan bilikti oftalmologtar jumys jasaıdy. Taıaýda men osy klınıkaǵa arnaıy baryp, hırýrg-dárigerlermen jolyǵyp qaıtqan edim. Obaldary ne kerek, olar qyzymnyń kózine ota jasaýǵa kelisim berdi. Tegin emes, árıne. Ota aqyly túrde jasalmaq. Onyń quny shamamen 60 myń reseı rýbli tóńireginde eken. Mundaı mólsherdegi qarajat óz qolymda bolsa, sol kúni-aq Orynbordaǵy klınıkaǵa jetkizbeımin be, qarashyǵymdy. Bul úshin janashyrlyq tanyta bilýge nıetti jandar men azamattardyń kómek qoldaryn sozýlaryn ótinemin.
Gúlnar DOSMUHAMBETOVA
ORAL