ASTANA. 14 mamyr. Búgin Jer reformasy jónindegi komıssııa otyrysy ótýde. Shara barysynda qoǵam qaıratkerleri men kásipkerler jer máselesi jaıynda óz oılaryn jetkizdi. Bul týraly egemen.kz tilshisi habarlady.
«Jaqsylyq» sharýa qojalyǵynyń tóraǵasy, qoǵam qaıratkeri Jaqsylyq Úshkempirov komıssııa otyrysynda jer máselesine baılanysty óz oıyn bildirdi. Onyń aıtýynsha, bos jatqan jerlerdi paıdalaný úshin sheteldik ınvestorlardy tartý kerek. Ol: «Nege biz sheteldik aýyl sharýashylyǵy taýarlaryn ımporttaı beremiz? Nege biz aqshamyzdy syrtqa shashamyz? Bulaı bolmaıdy. Biz qaıta ınvestor tartyp, jerge jan bitirip, kútip-baptap, maqsatty paıdalanyp, óz ónimderimizdi eksportqa shyǵarýymyz kerek. Ol úshin úkimet Jer kodeksin qaıta qarap, keıbir baptaryna rasymen túzetýler engizip, jerdi otandyq kásipkerlerge jekemenshikke berýi kerek. Sonda ǵana kásipkerler aýylsharýashylyq salasyna tolyq bet burady. Al sheteldikterge jalǵa berý degendi áli de aqyldasý kerek, oılaný kerek», – dedi.
Al Qyzylorda oblysyndaǵy «RZA» jaýapkershiligi shekteýli seriktestiginiń tóraǵasy Samurat Imandosov jerdi otandyq bıznes ókilderine jekeshelendirip berý qajet dep sanaıdy. «Elimizde mıllıondaǵan aýylsharýashylyq maqsatyndaǵy jerler bos jatyr. Sondyqtan qaraýsyz qalǵan jerdiń topyraǵy tozyp, aram shóp qaptap ketken. Meniń oıymsha, memleket osyndaı jerdi kásipkerlerge berý kerek. Budan elimiz esh utylmaıdy. Qaıta sol kásipker arqyly aýyldyń ekonomıkasy damıdy. Halyqqa jumys kúshi bolady. Jergilikti turǵyndar nápaqasyn osylaı tabady», – deıdi ol.
Aıta keteıik, Jer reformasy jónindegi komıssııa otyrysy Ulttyq mýzeıde ótýde. Onda komıssııa músheleri óz oı-pikirlerin aıtyp, halyqtyń kókeıindegi máseleni qozǵap jatyr.
Talǵat Raıymbekov.
Derek, foto: egemen.kz.