Qosqan jáne qosar úlesimiz qomaqty

BUU-nyń Nıý-Iorktegi shtab-páteriniń EKOSOS zalynda joǵary deńgeıdegi shara ótti. Ol Qazaqstannyń BUU-nyń energetıka jó­nindegi ornyqty damý maqsat­taryn júzege asyrýǵa qos­qan úlesine arnaldy. Sha­rada, sondaı-aq, aldaǵy jyly Astanada ótetin EKSPO-2017 halyq­aralyq mamandandyrylǵan kórmesiniń tusaýkeseri uıymdastyryldy. Sharany uıymdastyrýǵa Qazaqstan Respýblıkasynyń BUU janyndaǵy Turaqty ókildigi, BUU-nyń Ekonomıkalyq jáne áleýmettik máseleler jónindegi departamenti, BUU Bas hatshysynyń óte álsiz damyǵan,  damýshy, teńizge shyǵatyn joly joq elder jáne shaǵyn aral damýshy memleketter jónindegi orynbasarynyń ofısi atsalysty. Kezdesýdi tabysty ótkizýge, sonymen qatar, «Astana EKSPO-2017» Ulttyq kompanııasy, Nazarbaev Ýnıversıtet, sondaı-aq, G-Global-dyń halyqaralyq hat­shylyǵy úlken úles qosty. Sharaǵa qatysýshylar – elshiler men BUU janyndaǵy turaqty ókildikterdiń sarap­shylary, úkimettik emes uıym­dardyń, ǵylymı jáne isker toptardyń ókilderi 2030 jylǵa qaraı energııaǵa barshanyń qol­jetimdiligin qamtamasyz etý maqsatyna jetý úshin jasalyp jatqan jumystarǵa baılanysty pikir almasty. Bul arada atalǵan maqsatqa jetý jolynda BUU-nyń, ulttyq úkimetterdiń, bıznestiń, azamattyq qoǵamnyń jáne basqa da múddeli taraptardyń kúsh-jigerlerin úılestirýleri kerek ekendigi atap kórsetildi. Shara barysynda BUU Bas hat­shysynyń orynbasary Gıan Chandra Acharıa, Bas hatshynyń ekonomıkalyq damý jónindegi kómekshisi Lennı Montel, BUU Bas hatshysynyń arnaıy ókili – Barsha úshin ornyqty ener­getıka bastamasynyń jetek­shisi Reıchel Kaıt, Nazarbaev Ýnı­versıtettiń ınnovasııalar jónindegi vıse-prezıdenti Qanat Baıǵalın, G-Global jetekshisiniń orynbasary Murat Qarymsaqov, úkimettik emes uıymdardyń, ǵylymı jáne isker toptardyń ókilderi sóz sóıledi. EKSPO-2017-niń ókili Rýs­lan Jemkov kórmege daıyn­dyq barysy týraly keń kólem­di tusaýkeser jasap, nysan­dardyń kórmeden keıin qandaı maqsattarda paıdalanylatyndary jóninde áńgimelep berdi. Qatysýshylar, sondaı-aq, Qazaqstannyń qýat tıimdiligin arttyrý, balamaly qýat kózderin damytý men qýattyń zamanaýı kózderine jalpyǵa ortaq qoljetimdilikti qamtamasyz etý salasyndaǵy ulttyq saıasatymen tanystyryldy. Osy jerde Qazaqstan Prezıdenti Nursultan Nazarbaevtyń Astanada BUU-nyń janynan «jasyl» tehnologııalar men ınvestısııalyq jobalardy damytý boıynsha Halyqaralyq ortalyq qurý jónindegi bastamasy týraly aqparat usynyldy. Shara sońynan bolǵan tal­qy­laýlar kezinde oǵan qaty­sýshylar «Bolashaqtyń energııasy» taqyrybynda EKSPO-2017 halyqaralyq mamandandyrylǵan kórmesin ótkizý – Qazaqstannyń energetıka salasynda jahandyq úılesimdi maqsattarǵa qol jetki­zýge qosatyn naqty úlesi bolatynyn atap kórsetti. Sáýlebek BIRJAN