Qazaqstandy umytpaı, qadir tutady

Qazaqstan Respýblıkasynyń Grek Respýb­lıka­syndaǵy elshiligi Aharnon qalasynda ótken iri gúl jármeńkesine qatysty. Bul qala álemdik mańyzy bar tarıhı jáne sáýlet eskertkishterimen erekshelenedi, buǵan qosa, 150 000 qala turǵynynyń basym bóligin ydyraǵan Keńes Odaǵynyń ókilderi, olardyń arasynda burynǵy qazaqstandyqtar da bar, quraıdy. Jármeńke qonaqtary qatarynda Grekııa qorshaǵan ortany qorǵaý jáne energetıka mınıstriniń orynbasary I.Tsıronıs, Aharnon qalasynyń mıtropolıti P.Fılıppý, Grekııa parlamentiniń depýtattary, kórshiles qalalar men aımaqtar basshylary boldy. Aharnon qalasynyń basshysy Iа.Kassavos quttyqtaý sózinde ústimizdegi jyly Ońtústik Qazaqstanda (Shymkent jáne Túrkistan qalalary) saparmen bolǵanyn aıta kelip, Aharnon turǵyndary ózderiniń ekinshi otandarymen tyǵyz baılanysta ekenin atap ótti. 2008 jyldan bastap Aharnon men Shymkent baýyrlas qalalar atandy. Búgingi tańda atalǵan eki qala arasynda ekijaqty yntymaqtastyq pen seriktestik damý ústinde. Qazaqstan Respýblıkasynyń Grek Respýblıkasyn­daǵy elshisi A.Volkov quttyqtaý sózinde memleketimiz bıyl úlken tarıhı oqıǵa – óz Táýelsizdiginiń 25 jyldyǵyn atap ótetinin aıtty. Respýblıkamyz atalǵan aralyqta turaqty jáne myqty memleket, damyǵan ekonomıkasy men jahanda nyq ustanymy bar aımaqtyq derjavaǵa aınalǵanyna da toqtaldy. Qazaqstanda ultaralyq jáne dinaralyq kelisimniń turaqty júıesi qalyptasqanyn, 10 000-nan astam grek dıasporasy kiretin Qazaqstan halqy Assambleıasynyń ultaralyq tatýlyq baǵytynda úlken jumystar atqaryp kele jatqanyn atap ótti. A.Volkov grek halqyna Qazaqstan Respýblıka­syndaǵy ekonomıkalyq, saıası, beıbitshilik, dinaralyq jáne ultaralyq kelisimdi damytýǵa qosqan úlesi úshin alǵys bildirdi. Buǵan qosa, jınalǵan qaýym Qazaqstannyń tarıhı qysqa merzim – Táýelsizdik jyldarynda qol jetkizgen tabystarymen tanystyryldy. Aharnon qalasynyń basshylyǵy men qazaqstandyq dıplomattardyń atsalysýymen uıymdastyrylǵan is-sharada elimizde Táýelsizdik mereıtoıyna qyzý daıyndyq jumystary júrgizilip jatqany jaıly aqparatqa turǵyndar zor qyzyǵýshylyq tanytty. Is-shara Aharnon qalasy mýnısıpalıteti fılarmonııalyq orkestriniń konsertimen jalǵasty. Bir aıta keterligi – orkestr quramynda burynǵy otandastarymyz da óner kórsetti. «Egemen-aqparat»