Dertti sábıdi delfın emdeıdi

Almatyda delfınderdi balalardyń serebraldy tyrysqaq aýrýyn emdeýge paıdalana bastady. Nebári 10 seanstan turatyn em-dom baǵdarlamasyn qazirdiń ózinde 50 balaǵa qoldanyp kórgen dárigerler bul emniń jaqsy nátıje kórsetkendigin aıtýda. Ǵylymı jetekshiler men dárigerler usynǵan 25 mınýttyq emdik baǵdarlama 2 bólimnen – «jaǵalaýdaǵy júzdesý» men «sýdaǵy serýennen» turady. Em júrgizý isin baqylaýshy mamandardyń aıtýynsha, syrqat bala­lardyń 90 paıyzy sý janýarymen kezdeskennen keıin jaǵdaılary ońalyp, sóıleýge talpynyp, túrli qımyl­dar jasaǵysy kelip, ómirge degen qulshynysy artqan. – Delfınder – bala psıhologııasyna erekshe áser ete alatyn sútqorektiler. Birinshiden, olardyń túri únemi kúlip turatyn jandy elestetse, ekinshiden, adam boıyndaǵy psıhologııalyq aýyrtpalyqty alyp tastaıtyndaı qasıetke ıe. Kóbine biz buıyrǵan tapsyrmadan góri óz betinshe basqa da qımyl-áreketterge barady. Bir jaqsysy, is-áreketteri balalarǵa kóp áser etedi. Osyǵan qaraǵanda, sý janýaryn durys baýlysa, adam jany men tánin emdeýdiń jańasha tásili paıda bolýǵa tıis, – dedi Almaty delfınaterapııa bóliminiń jetekshisi Alekseı Polıshýk. Nıkol, Katıa jáne Iýmı atty 3 delfın sýda da, jaǵada da syrqat balalardyń kóńilin aýlap, óz oıynyn kórsetedi. Sıpaýǵa, ustap kórýge jáne birge júzýge tyrysqan balalar bir sát ózderiniń dertin umytyp, ómirge degen qulshynysy artady. Dárigerlerdiń aıtýynsha, olardan shyǵatyn ýltra dybys adam aǵzasyna erekshe áser etip, álsiz deneniń ımmýnıtetin kóterýge jáne psıhıkalyq qalybyn jaqsartýǵa zor yqpal jasaıdy. Qanat ESKENDIR, «Egemen Qazaqstan» ALMATY