Qarjy ýaqytyly ıgerilýi tıis

Premer-Mınıstrdiń orynbasary Darıǵa Nazarbaeva «Nurly Jol» ınfraqurylymdy damytýdyń 2015-2019 jyldarǵa arnalǵan memlekettik baǵdarlamasyn júzege asyrý máseleleri jóninde keńes ótkizip, bilim berý salalarynyń qurylysyna baǵyttalǵan qarjylaı qarajatty ýaqytyly ıgerý boıynsha sharalar qabyldaýdy tapsyrdy. Aǵymdaǵy jyly Ulttyq qor qarajaty esebinen bilim berý nysandarynyń qury­lysyna 57 mlrd. teńge bólindi, ol qarjyǵa búginde 96 nysannyń qurylysy júrgizilip jatyr. Onyń ishinde 51,2 mlrd. teńgege 77 mektep, sondaı-aq, 6,7 mlrd. teńgege 19 balabaqsha qurylysy júrgizilýde. Keńes barysynda Bilim jáne ǵylym vıse-mınıstri Bıbigúl Asy­lova 1 tamyzdaǵy jaǵdaı boı­yn­sha jergilikti atqarýshy organ­darǵa 26,9 mlrd. teńge, ıaǵnı jyldyq jospardyń 46%-y aý­darylǵanyn málimdedi. Vıse-mı­nıstr 21 bilim berý nysany, onyń ishin­de 13 mektep (Qyzylorda obly­synda – 2, OQO-da – 7, Aqtóbe, Shyǵys Qazaqstan jáne Mańǵystaý, Sol­tústik Qazaqstan oblystarynda – 1 mektepten), sondaı-aq, 8 balabaqsha (Almaty oblysynda – 2, Qaraǵandy, Mańǵystaý oblys­tarynda, SQO-da, OQO-da, Alma­ty qalasynda – 1 nysannan) paıda­lanýǵa berilgenin jetkizdi. Oǵan qosa, ol merdigerlerdiń sotqa júginýi, talqylaýy, merdi­gerdiń qurylys-mon­taj jumystary kestesinen keıin qalýy, memlekettik satyp alýlardyń aıaqtalmaǵan rásimderi jáne kelisimshartty kesh jasaý qarajattyń ıgerilmeýiniń negizgi sebepteri bolyp tabylatynyn aıtty. О́z kezeginde Premer-Mınıstr­diń oryn­basary D.Nazarbaeva ob­lystardyń, Astana jáne Almaty qalalarynyń ákimdik­terine bilim berý nysandaryn paıdalaný­ǵa berý merzimderin keshiktirgen merdigerlermen júıeli jumystar júrgizýdi tapsyrdy. «Qarjylaı qarajatty ýaqytyly ıgerý boıynsha sharalardy qabyldaý, sondaı-aq, baqylaýdy kúsheıtý jáne tıisti vedomstvo tarapynan nysandar qurylysynyń barysyna monıtorıng júrgizý tetigin jasaý qajet», dep atap kórsetti D.Nazarbaeva. «Egemen-aqparat»