Sot aldyna barmaı-aq...

Almaty qalasynda Qazaqstan halqy Assambleıasynyń ókildigi respýblıkalyq «Medıasııa kúni» aksııasy aıasynda qala jurtshylyǵyn túrli túıtkildi máselelerge qatysty «Ashyq esik» formatynda qabyldady. Dostyq úıi janynan ashyl­ǵan medıasııa kabınetiniń bitim­gershilik qyzmetine jáne zańdyq keńes alýǵa júgingen kisilerdiń deni otbasylyq, áleýmettik jáne kórshiler arasynda bolatyn túsinispeýshilik máseleleri boıynsha kelgen eken. Árıne, qoǵam bolǵannan keıin múlikke jáne t.b. qatysty kelispeýshilik sekildi jaǵdaılar azamattar arasynda jıi týyndap otyratyny ras. Qazaqstan halqy Assambleıasynyń zańgerleri turǵyndarǵa zańdyq keńes berýmen qatar, máseleni ýshyq­tyrmaı, qos tarap úshin de paıdaly sheshilýine yqpal jasaý­dyń tıimdiligin túsindirdi. Elimizde «Medıasııa týraly» Zań qabyldanyp, onyń kómegimen kóptegen shaǵyn jáne ortasha dárejedegi qylmystyq ister, azamattyq, eńbek daýy, otbasylyq jáne ózara quqyqtyq qatynastarǵa baılanysty jekelegen ister óz sheshimin taýyp kele jatqanyna da 5 jyldyń júzi boldy. Shaǵymdanýshy azamattar men zańdy tulǵalar medıa­sııaǵa belsendi túrde jú­ginýiniń arqasynda sot júıesine túsetin aýyrtpalyq jeńildep, túrli deńgeıdegi isterdiń tyńǵylyqty sheshim tabý sapasy anaǵurlym artatynyn osy ýaqyt aralyǵyndaǵy tájirıbe kórsetip otyr. Qazaqstanda «Medıasııa týraly» Zań 2011 jyldyń 5 tamyzynda kúshine engen bolatyn. Bul zań medıasııany uıymdastyrý salasyndaǵy qoǵamdyq qatynastardy rettep, ony júrgizý qaǵıdattary men rásimin, sondaı-aq, medıa­tordyń mártebesin aıqyndap berdi. Qanat ESKENDIR, «Egemen Qazaqstan» ALMATY