Serbııa «Nurly jol» baǵdarlamasyna qatysady

Belgrad qalasynda Elbasy Nursultan Nazarbaevtyń Serbııaǵa resmı sapary qarsańynda eki eldiń saýda-ekonomıkalyq yntymaqtastyq jónindegi úkimetaralyq komıssııasynyń birinshi otyrysy ótti. Jıynda saýda jáne ınvestısııalar, geologııa jáne aýyl sharýashylyǵy, qorshaǵan ortany qorǵaý, bilim, qurylys jáne týrızmdi damytý máseleleri talqylandy. Plenarlyq sessııaǵa Ulttyq ekonomıka mınıstri Qýandyq Bıshimbaev pen Serbııanyń ekonomıka mınıstri Goran Knejevıch qatysty. Bıshimbaev óz sózinde byltyr eki eldiń taýar aınalymy 55,8 mln. AQSh dollaryn quraǵanyn, alaıda, bul kórsetkishtiń qolda bar áleýetke sáıkes emestigin atap ótti. Sonymen birge ol 31 mamyrda Eýrazııalyq Ekonomıkalyq Odaqqa múshe memleketterdiń basshylary Serbııa elimen erkin saýda týraly kelisim boıynsha kelissózder bastaý týraly sheshim qabyldaǵanyn eske saldy. «Bul kelisim Qazaqstan men Serbııanyń saýda-ekonomıkalyq qarym-qatynastaryn jańa deńgeıge shyǵarýǵa múmkindik beredi», dedi ol. Kezdesýde aýyl sharýashylyǵy salasyndaǵy yntymaqtastyq máselesi keńinen talqylandy. Qazaqstan tarapy ósimdik sharýashylyǵy men mal sharýashylyǵy salasynda ózara is-qımyldy damytýǵa múddeli ekenin málimdedi. «Biz astyq pen tabıǵı taza etti eksporttaýǵa daıynbyz», dedi Qýandyq Bıshimbaev. Sondaı-aq, ol eki eldiń úzdik joǵary oqý oryndarynyń tájirıbe almasý kerektigin aıtyp, bilim jáne ǵylym salasynda sheshilmegen máselelerge nazar aýdardy.  Osy oraıda mınıstr eki el ǵalymdarynyń tájirıbe almasý úshin tyǵyz qarym-qatynas ornatyp, ózara saparlar uıymdastyrýǵa bolatynyn aıtty. Osydan keıin ol «Astana» halyqaralyq qarjy ortalyǵynda ınvestorlar úshin jasalatyn jaǵdaılar týraly aıtyp berdi. «Qazaqstan táýelsizdigin alǵan kezden beri  ınvestorlar úshin barlyq jaǵdaılar jasap jatyr. Biz Serbııa qurylys kompanııalaryn «Nurly jol» memlekettik baǵdarlamasy boıynsha iske asyrylatyn jobalarǵa qatysýǵa shaqyramyz», dedi Qýandyq Bıshimbaev. Otyrysta Serbııa tarapy Qazaqstannyń kásipkerlerin energetıka jáne taý-ken ónerkásibi, qurylys jáne qurylys materıaldary ónerkásibi, mashına jasaý, qolóner, aýyl sharýashylyǵy, hımııa jáne farmasevtıka ónerkásibi salasyndaǵy bıznes ortamen jaqynyraq tanysýǵa shaqyrdy. Kezdesýde Serbııanyń qurylys jáne jobalaý kompanııalary Qazaqstandaǵy turǵyn úı-qurylys baǵdarlamasyna, jol jóndeý, áýejaı qurylysy men qurylys ónimderin jetkizý jumystaryna qyzyǵýshylyq bildirdi. Jıyn sońynda taraptar eki eldiń arasyndaǵy yntymaqtastyq jónindegi iskerlik keńes qurý týraly sheshim qabyldady. Ol Qazaqstan men Serbııanyń bıznesi arasynda ózara is-qımyldy úılestiretin organ bolady. Endi eki eldiń saýda-ekonomıkalyq yntymaqtastyq jónindegi úkimetaralyq komıssııasynyń ekinshi otyrysy Astanada ótedi. Dastan KENJALIN