Elbasy Qazaqstan-Polsha bıznes-forýmyna qatysty

Qazaqstan men Polsha isker toptarynyń 400-den astam ókili qatysqan forýmda ınvestısııa jáne saýda-ekonomıka salasyndaǵy ekijaqty yntymaqtastyqty keńeıtý joldary qarastyryldy. Bul týraly akorda.kz habarlady. Elbasy qatysýshylarǵa arnaǵan sózinde Qazaqstannyń Polshany Eýropalyq Odaqtaǵy senimdi saıası jáne ekonomıkalyq seriktesi retinde qarastyratynyn atap ótti. «Qazaqstan men Polsha arasyndaǵy taýar aınalymy 2015 jyl qorytyndysy boıynsha 1,1 mlrd. boldy, bul qazirgi áleýetimizdi tolyq kórsete almaıdy. Qazaqstannyń Polshaǵa eksportynda energııa resýrstary, shıkizat jáne hımııa, kómir ónerkásibi, qara metallýrgııa, astyq pen maqta, basqa da aýyl sharýashylyǵy ónimderi basym. Polshadan Qazaqstanǵa jetkiziletin negizgi ımport túrleri – elektrlik-turmystyq qurylǵylar men jabdyqtar, hımııa ónerkásibi men aýyl sharýashylyǵy ónimderi, azyq-túlik taýarlary, jıhaz. Qazir Qazaqstanda Polsha azamattarynyń qatysýmen 100-den astam kásiporyn jumys júrgizýde. Birqatar polıak kásiporyndary farmasevtıka jáne qurylys sııaqty salalardaǵy jobalardy júzege asyrýda. Taǵy da ondaǵan polıak kompanııalary bizben yntymaqtastyq ornatýǵa múddeli ekenin bilemin. Búginde Qazaqstanda polıak kompanııalarynyń qatysýymen quny 100 mln dollar bolatyn 3 joba júzege asyrylyp jatyr», – dedi Prezıdent Nursultan Nazarbaev. Elbasy sondaı-aq Qazaqstandy polıaktardyń shaǵyn jáne orta kásipkerlikti damytý tájirıbesi qyzyqtyratynyn aıtty. «Biz memlekettik saıasattyń basym baǵyty bolyp sanatyn shaǵyn jáne orta bızneske jan-jaqty qoldaý kórsetýdemiz. Kásipkerlerge kómektesý úshin bızneske qolaıly jaǵdaılar týǵyzýǵa baǵyttalǵan ulttyq baǵdarlamalar júzege asyrylýda. Kásipkerlerge ataýly kómek kórsetetin «Damý» atty kásipkerlikti damytýdyń arnaýly qory jumys isteıdi. Bizdi sizderdiń agroónerkásip keshenin damytý, aýyl sharýashylyǵy ónimderin óńdeý, kólik jáne logıstıka, energetıka, farmasevtıka salalaryndaǵy tájirıbelerińiz qyzyqtyrady. Men eki eldiń bıznes ókilderin qyzyqtyrýy múmkin birneshe salany ǵana atap óttim. Bul rette Polsha úkimeti qabyldaǵan Perspektıvaly naryqtardy ıgerýdiń 2013-2016 jyldarǵa arnalǵan baǵdarlamasynyń áleýetin belsendirek paıdalaný qajet. Onda Qazaqstan Brazılııa, Kanada, Túrkııa jáne Aljırmen birge perspektıvaly bes ekonomıkalyq naryqtyń biri retinde kórsetilgen. Budan bólek, Polshada bizdiń elmen birqatar saladaǵy yntymaqtastyq týraly arnaýly baǵdarlamalar júzege asyrylýda», – dedi Memleket basshysy. Qazaqstan Prezıdenti bıyl jyl sońynda Brıýsselde ótetin EAEO men Eýropalyq Odaq arasyndaǵy konferensııany eske sala otyryp, ıntegrasııalyq birlestikter arasyndaǵy yntymaqtastyqty jolǵa qoıý qajettigine nazar aýdardy. Nursultan Nazarbaev ınvestısııalyq tartymdylyqtyń jańa deńgeıine kóterilý úshin Qazaqstanda qandaı jumystar jasalyp jatqanyna, onyń ishinde Bes ınstıtýsıonaldyq reformany iske asyrý jónindegi ult jospary – 100 naqty qadam jáne ındýstrııalyq-ınnovasııalyq damý baǵdarlamasy aıasyndaǵy ákimshilik kedergilerdi azaıtý jónindegi sharalarǵa toqtaldy. Elbasy eki eldiń kólik-tranzıt áleýetin tıimdi paıdalanýdyń mańyzdylyǵyn atap ótti. Osyǵan baılanysty, Nursultan Nazarbaev Qazaqstan, Polsha jáne Reseı arasynda kólik salasyndaǵy úshjaqty kelisimdi pysyqtaý jáne Kavkaz tranzıttik dálizin paıdalaný jóninde bastama kóterdi. Sońynda Memleket basshysy bıznes-forým eki el bıznesiniń ózara tıimdi seriktestigi úshin jańa perspektıvalarǵa jol ashady dep úmittenetin jetkizdi jáne polıak isker toptary ókilderin elimizdegi memlekettik baǵdarlamalardyń júzege asyrylýyna belsene atsalysýǵa shaqyrdy. Talǵat RAIYMBEK