Kósh basyndaǵy tartys kúsheıe tústi

О́tken demalys kúnderi fýtboldan Qazaqstan premer-lıgasynyń 27-týry oıyndary oınaldy. Kósh basyndaǵy «Astana» syrt alańda «Aqtóbeden» 2:1 esebimen basym tússe, onyń basty qarsylasy «Qaırat» Almatyda dál osyndaı eseppen Pavlodardyń «Ertisin» jeńdi. Jalpy, sońǵy jyldary el chempıo­natynda «Astana» men «Qaırattyń» mereıi ústem bolyp tur. Bir kezderi aıdarynan jel esken «Aqtóbe» komandasynda búginde burynǵydaı minez joq. «Ertis» pen «Tobyldyń» da kórsetip júrgen qaıraty shamaly. Sol sebepti, otandyq jankúıerler kóbine «Astana» men «Qaırattyń» oıyn­daryna erekshe mán berip, qyzy­ǵý­shylyq tanytyp keledi. Sonymen, bolgar mamany Stanı­mır Stoılovtyń shákirtteri kezek­ti ret chempıondyq ataqtaryn qor­ǵap qalý­ǵa jaqyndaı tústi. «Aqtó­be­men» bol­ǵan oıynda tizgindi bir­den qol­dary­na alǵan chempıondar 11-mı­nýtta kon­golyq legıo­ner Jýnıor Kaba­nan­­ganyń kómegimen esep ashty. Al ekinshi taımda alań ıe­leri jınaqy­lyq tanytyp, júıeli oınaı bastady. Nátıjesinde 66-mınýtta Egor Soro­kın tarazy basyn teńestirip ketti. Ár oıynǵa sheshýshi match retinde qaraı­tyn «Astana» úshin bul eseptiń kóńil kón­shitpeıtini belgili. Son­dyq­tan, el­or­da­lyqtar qarqyn­­da­ryn kúsheı­tip, taıly-tuıaǵy­men shabýyl­ǵa shyq­ty. Bul oıyn taktıkasy 87-mınýtta óz jemi­sin berip, qorǵaýshy Marın Anı­chıch jeńis golyn soqty. Osy jeńis­ten keıin «Astana» 62 upaımen týrnır kestesindegi kósh­basshylyq ornyn saqtap qaldy. Bul týrda jeńiske jetken «Qaırat» komandasy da ázirge chempıondyqtan úmitin úzgen joq. О́z alańynda «Ertisti» qabyldaǵan almatylyqtar 23-mınýtta alǵa shyqty. Goldyń avtory – chempıonattyń úzdik mergeni Jerar Goý. Kezdesýdiń 78-mınýtyn­da «Ertis» sapynan Shota Grıgalashvılı nátıjeli soqqy jasap, esepti teńes­tirdi. Alaıda, arada bar bolǵany 3 mınýt ótkende, «Qaırattyń» kapıtany Baýyrjan Islamhan mergendigimen kózge túsip, komandasyna jeńis syılady. Osylaısha, Kahaber Shadadzeniń shákirtteri qorjyndaryndaǵy upaı sanyn 58-ge jetkizdi. Birinshi altylyqtyń taǵy bir kez­desý Shymkenttiń «Ordabasy» men Kókshetaýdyń «Oqjetpesi» arasynda ótti. Bul oıynda shymkenttikter 1:0 esebimen jeńiske jetip, 43 upaımen úshinshi orynǵa jaıǵasty. Premer-lıgada qalý úshin ter tógip júrgen ekinshi altylyqtyń oıyn­dary da tartyspen ótýde. Ásirese, Oraldyń «Aqjaıyǵy» qarsylas shaq keltirer emes. Beınebir maýsym sońynda ekin­shi tynysy ashylǵandaı áser qaldy­rady. Qatarynan besinshi ret jeńis­ke jetken komanda eń sońǵy oryn­nan joǵary kóterildi. Bul joly oraldyqtardyń «qurbany» bolǵan komanda – «Atyraý». Batys derbıinde «Aqjaıyq» qonaqta 2:1 esebimen jeńiske jetti. Týr barysynda jankúıerlerdiń nazaryn aýdarǵan kelesi match Tal­dy­qorǵanda ótti. Sońǵy mınýtqa deıin jeńip turyp, tóreshi qosqan qosym­sha ýaqytta ǵana qaqpasyna eki dop jiberip alǵan jergilikti «Jetisý» Qaraǵandynyń «Shahterine» ese jiberdi. Al syrt alańda Qostanaıdyń «Tobylynan» 1:3 esebimen jeńilgen «Taraz» týrnır kestesindegi sońǵy orynǵa syrǵýǵa májbúr boldy.  Elaman QOŃYR, Jýrnalıst