FIFA «Altyn doptan» aıyrylyp qaldy

Fransýzdyń France Football jýrnaly Halyqaralyq fýtbol federasııasymen (FIFA) álemniń úzdik oıynshysyna tapsyrylatyn «Altyn dop» jekeleı nagradasy jónindegi áriptestigin toqtatty. Basylym saıty muny 16 qyrkúıek, juma kúni jazdy. Atap ótilgendeı, taraptar áriptestikti jalǵastyrý jónindegi kelisimge kele almaǵan. Endi bul saladaǵy ózgeris bıylǵy jyldan bastalady. Fýtboldaǵy basty jekeleı marapatty tapsyrýdyń jańa erejeleri jýrnaldyń 20 qyrkúıek, seısenbi kúni shyǵatyn nómirinde keńinen jazylady. «FIFA-nyń altyn doby» – jyldyń qorytyndysy boıynsha úzdik fýtbolshyǵa tapsyrylatyn júlde. Nagrada 2010 jyly France Football  versııasy boıynsha anyqtalatyn «Altyn dop» jáne «FIFA-nyń jyl oıynshysy» atty eki júldeniń birigýi nátıjesinde paıda bolǵan. Sodan beri jeńimpaz fransýz basylymy jýrna­lıs­teriniń, jattyqtyrýshylar men ulttyq quramalar kapıtandarynyń daýys berýleri jolymen anyqtalyp keldi. «FIFA-nyń altyn doby» júldesin sońǵy ret «Barselona» komandasynyń shabýyl­shysy Lıonel Messı jeńip al­ǵan edi. Ol bul ataqqa 2009-2012, 2015 jyl­dary bes ret ıe boldy. Úsh nagradany Madrıdtiń «Real» komandasynyń for­var­dy Krıshtıaný Ronaldý (2008, 2013, 2014), gollandııalyq shabýylshylar Iohana Kroıfa (1971, 1973, 1974) pen Marko van Bastena (1988, 1989, 1992), son­daı-aq, fransýzdyń jartylaı qorǵaý­shysy Mıshel Platını (1983-1985 j.) alǵan. France Football – fransýzdyń 1946 jyldan beri seısenbi jáne juma kún­deri shyǵyp kele jatqan fýtbol taqy­ry­byndaǵy jýrnaly. Ol «Altyn dop» júldesin 1956 jyldan beri tap­syryp keledi. Demek, júldeniń taǵaıyn­dal­ǵanyna da bıyl 60 jyl tolyp otyr.   Damır QOJAMQUL