Taekvondoshylar tabyspen oraldy

Italııada ITF taekvondo boıynsha jasóspirimer jáne ardagerler arasynda ótken álem chempıonatynan qaraǵandylyq jekpe-jek sheberleri tamasha tabyspen oraldy. Jalpy, bul dúnıejúzilik dodadan qazaqstandyq taekvondoshylar qundylyǵy ártúrli 18 medalmen oraldy. Al qaraǵandylyq sportshylardyń enshisine osy júldelerdiń basym bóligi buıyrdy: tórt altyn, segiz kúmis jáne tórt qola medal! Álem chempıonatynda 68 elden kelgen 800-den astam taekvondoshy baq synaǵan. Mine, osyndaı básekesi óte joǵary jarysta namysty qoldan bermegen qaraǵandylyq sheberlerdiń tabysyn qaı jaǵynan maqtasa da ábden oryndy. Chempıonattaǵy aıqastardyń shıelenisti jaǵdaıda ótkeni sonshalyqty, fınaldyq synǵa joldama alý úshin árbir sportshyǵa kem degende 5-6 jekpe-jek ótkizýge týra kelgen. 16-17 jastaǵy jasóspirimder arasyndaǵy synda Georgıı Androsov 63 kılo salmaqta top jarsa, Álııa Súleımenova 70 kılo salmaq dárejesi boıynsha  ardagerler arasynda álem chempıony atandy. Al komandalyq arnaıy tehnıka synynda jeńis tuǵyrynyń eń bıik satysyna kóterilgen el quramasynyń sapynda qaraǵandylyq Georgıı Androsov pen Aleksandr Orlov syndy sheberler boldy. – Mine, 15 jyldan beri el quramasynyń negizin qaraǵandylyq sportshylar qurap keledi, – deıdi taekvondodan Qazaqstan qurama komandasynyń aǵa jattyqtyrýshysy Valerıı Kogaı. – Búgingi kúnde mundaı dástúr ábden qalyptasyp, óziniń ıgi jemisin berip jatyr. Qazir biz árbir chempıonattan júldesiz qaıtyp júrgen joqpyz. Degenmen, bıylǵy nátıje – Qaraǵandy taekvondosynyń tarıhyndaǵy eń úlken jetistik. Italııadan oljamen oralǵan sportshylardy jerlesteri qushaq jaıa qarsy alyp, laıyqty syı-qurmet kórsetti. Qaırat ÁBILDINOV, «Egemen Qazaqstan» QARAǴANDY