Brazılııa Qazaqstanǵa Dúnıejúzilik taý-ken kongresin ótkizý estafetasyn tapsyrdy

21 qazan kúni Rıo-de-Janeıroda Dúnıejúzilik taý-ken kongresiniń (DTK) dástúrli sımvoly «Maı shamdy» ıaǵnı, Kongresti ótkizý quqyǵy estafetasyn saltanatty túrde Qazaqstanǵa tapsyrý rásimi ótti, dep habarlaıdy QazAqparat QR Investısııalar jáne damý mınıstrliginiń baspasóz qyzmetinen málim etti. Saltanatty rásimde Brazılııanyń Taý-ken óndirý qaýymdastyǵynyń basshysy Hose Fernando Koýra, DTK 2016 tóraǵasy Jar Karlos Koppe (Brazılııa),  DTK tóraǵasy Djozef Dýbınskı (Polsha), VALE bas atqarýshy dırektory Mýrılo Ferreıra, qazirgi Halyqaralyq uıymdastyrý komıtetiniń múshesi, QR Investısııalar jáne damý mınıstrligi Indýstrııalyq damý jáne óndiristik qaýipsizdik komıteti tóraǵasynyń orynbasary Qanat Baıtov sóz sóıledi. «Taý-ken metallýrgııalyq keshen Qazaqstan úshin eldiń ekonomıka salasynda mańyzdy jobalardyń biri bolyp tabylady. Jalpy óndiristik kásiporyn salasynda TMK  18% quraıdy. Sondyqtan, 2018 jyly Astanada Dúnıejúzilik taý-ken kongresin ótkizý biz úshin óte mańyzdy oqıǵa bolmaq. Bul óz kezeginde eldiń barlyq sektoryna oń yqpal eteri sózsiz. Búginge deıin jınaǵan tájirıbemiz ben bilimimizge súıene otyryp, 2018 jyly DTK-ni joǵary halyqaralyq deńgeıde ótkizetinimizge senimdimin»,-dedi Qanat Baıtov. Sonymen qatar, DTK-niń jabylý saltanatynda osy kúnge deıin Qazaqstanda eki ret bolǵan, Astana Mining & Metallurgy Halyqaralyq taý-ken metallýrgııalyq kongresine qatysqan professor Djozef Dýbınskı Qazaqstan 2018 jyly Dúnıejúzilik taý-ken kongresin sátti ótkizetinine senim bildirdi. Budan bólek, 2018 jyly Astanada ótetin Kongress ataýly eki datany da atap ótetin bolady. Iаǵnı, Kongress 25-shi ret ótedi jáne onyń qurylǵanyna 60 jyl tolady. Saltanatty rásim qorytyndysy boıynsha,  Brazılııanyń Taý-ken óndirý qaýymdastyǵynyń basshysy Hose Fernando Koýra DTK dástúrli sımvoly «Maı shamdy» Qazaqstan Respýblıkasynyń Tótenshe jáne ókiletti elshisi Qaırat Sarjanovqa tapsyrdy. Dúnıejúzilik taý-ken kongresi 2016 aıasynda ekijaqty birqatar kezdesýler ótti. Onda DTK tehnologııalyq máseleleri talqylanyp,  jańashyldyqtar usynyldy. Iаǵnı, ekonomıkalyq turǵyda kompanııalardy basqarý, halyqaralyq qarjylandyrý men yntymaqtastyq sııaqty ózekti taqyryptar talqyǵa tústi. Qazaqstandyq delegasııa quramyna Qazaqstannyń memlekettik salalarynyń, ınstıtýttardyń, TMK iri profıldi kompanııalardyń ókilderi jáne óz kezeginde DTK 2018 operatory bolyp tabylatyn Iteca kórme kompanııasynyń ókilderi kirdi. Esterińizge sala keteıik, 2018 jyly 19-22 maýsymda Astanada 25-shi Dúnıejúzilik taý-ken kongresi ótedi. Atalǵan shara dástúrli AstanaMining & Metallurgy Halyqaralyq taý-ken metallýrgııa kongresi bazasy aıasynda uıymdastyrylady.