«Egemen Qazaqstan» basshysy Qaraǵandy oblysynda boldy

Keshe Qaraǵandy oblysynyń ákimi Nurmuhambet Ábdibekov óńirge jumys saparymen kelgen «Egemen Qazaqstan» respýblıkalyq gazeti» AQ Basqarma tóraǵasy Darhan Qydyrálini qabyldady. Kezdesý barysynda  elimizdiń bas basylymynda bolyp jatqan ózgerister barysy jáne gazet betinde Qaraǵandy óńiriniń tynys-tirshiligi týraly materıaldardyń kórinis tabýy týraly áńgime boldy. Munyń aldynda «Egemen Qazaqstannyń» basshysy Qaraǵandy memlekettik tehnıkalyq ýnıversıtetinde oqý ornynyń rektory akademık Arstan Ǵazalıev bastaǵan professor-oqytýshylar quramy jáne stýdenttermen kezdesý ótkizgen bolatyn. Qaraǵandylyq zııaly qaýym ókilderi de qatysqan bul kezdesý barysynda joǵary oqý orny men respýblıkalyq BAQ-tyń áriptestik máseleleri sóz boldy. Sharaǵa qatysýshylar Darhan Qydyrálige ózderin qyzyqtyrǵan saýaldaryn qoıyp, jan-jaqty jaýap  aldy. «Egemen Qazaqstan» gazetiniń basshysy qaıtar jolda Temirtaýdaǵy «Tuńǵysh Prezıdenttiń tarıhı-mádenı ortalyǵyna» soǵyp, ondaǵy «Qurmet kitabyna» tilek jazyp, qoltańba qaldyrdy. Qaırat Ábildınov, "Egemen Qazaqstan". Qaraǵandy oblysy