Qanat Islam: Reıtıngim ósse, Lara menen qasha almaıdy

«Men Kanelomen de, Kottomen de kezdesýge daıynmyn», - dedi Qanat Islam nur.kz portalyna bergen suhbatynda. Áńgimeni Almatydaǵy ótken kásipqoı boks keshinen bastaǵan Qanat: «Bul jekpe-jek maǵan úlken tájirıbe boldy. Meniń maqsatym álem chempıony bolý. Sol úshin ter tógip júrmin. Álem chempıony kim? Lara, Kotto, Kanelo. Meniń bokspen aınalysqan ýaqytym olardan artyq bolmasa kem emes. Qazir kez-kelgenimen judyryqtasýǵa daıynmyn», - dedi. Sondaı-aq osy boks keshiniń óte joǵary baǵaǵa ıe bolǵanyn da atap ótti. «Golden Boy Promotions», «Top Rank Promotions» jáne de kóptegen promoýterlik kompanııalar búginge deıin habarlasyp, Qazaqstanda jekpe-jek uıymdastyrýǵa usynys aıtyp jatyr... 12 myńdyq arenaǵa 15 myń adamnyń kelýi, qanasha adamnyń dalada kire almaı qalǵany munyń bári qazaqstandyqtardyń sportqa, boksqa degen qyzyǵýshylyǵynyń dáleli» - dedi ol. Qanat atalmysh boks keshinen keıingi isinip ketken judyryǵy jaıyndaǵy saýalǵa: «Bul boks. Rıng án aıtyp, bı bıleıtin jer emes. Rıngte jan alysyp, jan berisesiń. Qanshama sportshylar rıngte jan tapsyrǵanyn bilesizder. Qanshama boksshylardyń qoly synyp, jekpe-jekti toqtatqan kezderi de bolǵan. Men 2-3 raýndta qolymnyń aýyrǵanyn sezdim. Biraq rıngte ony oılaýǵa mende múmkindik bolmady. Maǵan qanshama qazaqstandyqtar jankúıer bolyp otyr. Bular ne isteı alady dep álem qarap otyr. Qolym aýyrmaq túgil, eki qolym túsip qalsa da maǵan shydaý kerek. Bul jerde ultymnyń abyroıy men namysy tur. Qol aýyrdy, bul syltaý emes. Keıde soqqyń shyntaqqa tıedi, keıde bassúıekke tıedi.Túrli jarystarda ártúrli jaraqattar bolyp turady. Bul solardyń biri ǵana. Qolǵapty jekpe-jek aldynda arnaıy AQSh pen Reseıden kelgen mamandar tekserdi, halyqaralyq talaptarǵa saı boldy. Boks syltaý aıtatyn sport emes», dep batyl da anyq jaýap berdi. Qanattyń qarqyny údep tur. «Bizge turyp qalýǵa, kóp kútýge bolmaıdy. Chempıondyq ataq úshin bolmasa da maǵan qazir jekpe-jek qajet. Sol ataqqa birtaban jaqyndaı berý kerek. Osy ýaqytqa deıin birneshe ret Laraǵa jekpe-jekke shyǵýǵa usynys tastadyq. Bas tartty. Eger men reıtıngte joǵarylasam, oǵan bas tartýǵa múmkindik bolmaı qalady. Sol úshin kóbirek jekpe-jek ótkizip, reıtıngte joǵarylaý kerek. Tek WBA emes, barlyq tujyrym boıynsha chempıon bolý kerekpin. Bul meniń maqsatym» dedi atalmysh suhbatta. «Almatyda ótken jekpe-jekten soń WBA ókilderi jekpe-jekti esepke almapty» degen áńgimelerge baılanysty saýalǵa ol: «Bul bizdegi boks jankúıerleriniń deńgeıiniń óskendigi. Kásipqoı boksqa degen qyzyǵýshylyq artqanynyń beligisi. Osy jarysyma WBA – diń jaýapty adamy keldi. Salmaq ólsheýde belbeýdi ózi ustap turdy, jeńgen kezimde rıngke shyǵyp belime taqty. «WBA fedelatin» men úshin baǵynǵan beles. Men onyń chempıonymyn. Birneshe ret qorǵadym. Tipti 90 kúnniń ishinde kim meni jekpe-jekke shaqyrady eken dep te kúttim. Eshkim shaqyrmady. Bul belbeýdi súıretip júre bergim kelmeıdi. Bul belbeý kelesi bıikke kóterilý úshin baspaldaq qana. Negizgi maqsat úshin jumys jasaý kerekpiz» dep jaýap bere kele, «osy oraıda aıta ketkim keledi, WBA-diń belbeýi úshin alańdap, reıtıng saıtta nege kórsetilmegen dep ýaıymdaǵan jankúıerlerime, jýrnalısterge, kásipqoı boks federasııasynyń vıse-prezıdenti Vıktor Demıanenko myrzaǵa alǵysym sheksiz. Osyndaı janashyrlarymnyń bary maǵan erekshe kúsh beredi», -dep tujyrdy sózin. Qashanda jankúıerlerin ózine óte jaqyn sezinetin, sezindire de biletin Qanattyń bul jaýaby neshe júz myńdaǵan jankúıerleriniń de úmitterin úkilep, mereılerin tasytyp tastary anyq.