Respýblıkalyq bıýdjet týraly zań jobasy Májiliske qaıtaryldy

Senat depýtattary "2017-2019 jyldarǵa arnalǵan respýblıkalyq bıýdjet týraly" zań jobasyn plenarlyq otyrysta qarastyryp, ózderiniń túzetýlerimen Májiliske qaıtardy, dep habarlady Today.kz. Senattyń profıldi komıtetiniń qorytyndysynda zań jobasyn talqylaý barysynda depýtattar men komıtetterdiń usynystaryn eskere otyryp, belgili bir ózgerister engizý qajettiligi týyndady delingen. Senat túzetýleri ShQO, Pavlodar oblystaryndaǵy sýmen qamtýǵa baǵyttalǵan jobalardy, Pavlodar, Atyraý, Soltústik Qazaqstan oblystaryndaǵy avtokólik joldaryn jóndeý, turǵyn úı salý, Batys Qazaqstan oblysynyń eldi mekenderin gazben qamtý jobalaryn qarjylandyrýdy arttyrýdy kózdeıdi. Bul jobalardy júzege asyrýǵa qosymsha 2017 jyly 26,1 mıllıard  teńge, 2018 jyly - 16,8 mıllıard teńge, 2019 jyly 10,1 mıllıard teńge bólý qarastyrylǵan. Sonymen qatar "Jumyspen qamtý jol kartasy - 2020" baǵdarlamasynyń ózgeristerine baılanysty buqaralyq kásipkerlik pen jumyspen qamtýǵa 113,5 mıllıard teńge bólinbek. Zań prosedýrasyna sáıkes, bul ózgeristerdi endi Májilis depýtatary qoldaýy kerek.