Salyq zańnamasyna ózgeris engizý týraly zań jobasy maquldandy

Búgin QR Parlamenti Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine salyq salý jáne kedendik ákimshilendirý máseleleri boıynsha ózgerister men tolyqtyrýlar engizý týraly» zań jobasy ekinshi oqylymda maquldandy, dep habarlaıdy QazAqparat. Zań jobasyn tanystyrý barysynda QR Ulttyq ekonomıka mınıstri Qýandyq Bıshimbaev usynylyp otyrǵan ózgerister qolaıly kásipkerlik orta qurýǵa, turaqty áleýmettik-ekonomıkalyq damýǵa jáne aǵymdaǵy mindetterdi júzege asyrýǵa baǵyttalǵanyn atap ótti. Máselen, bızneske salyqtyq jáne ákimshilik júktemeni boldyrmaý maqsatynda qoldanystaǵy qosylǵan qun salyǵy boıynsha esepke qoıý úshin eń tómen shekti mándi 2017 jyldy qosa alǵanda 30 myń AEK-ke deıin saqtaý qarastyrylǵan. Budan keıin 2020 jylǵa qaraı kezeń-kezeńmen 15 myń AEK-ke deıin tómendetý eskerilgen. «Alkogol ónimderi men temeki zattaryna arnalǵan aksızderdiń fıskaldyq fýnksııalaryn kúsheıtý maqsatynda aksızderdi kezeń-kezeńmen arttyrý usynylady», - dedi mınıstr. Jer qoınaýyn paıdalanýǵa ınvestısııalardy yntalandyrý maqsatynda kommersııalyq kórinis bolmaǵan jaǵdaıda ınvestısııalyq qarjylandyrý boıynsha qaryzdardy esepten shyǵarý kezindegi tabysty korporatıvti tabys salyǵynan bosatý qarastyrylǵan. Budan basqa, ulttyq operatorǵa gaz ótkizetin jer qoınaýyn paıdalanýshylarǵa salyq salý problemalaryn sheshý maqsatynda gaz óndirýdiń ózindik qunyna baılanysty naqty ótkizý baǵasy boıynsha kiristi aıqyndaıtyn norma usynylady. Zań jobasynda salyqtyq ákimshilendirý boıynsha túzetýler blogy eskerilip otyr. Onyń ishinde jeke tulǵalardy jalpyǵa birdeı deklarasııalaýdy engizý merzimin uzartý, elektrondy shot-faktýralardy engizý merzimderin uzartý, monıtorıngilýge jatatyn iri salyq tóleýshiler tizbesin qurý tártibin naqtylaý usynylady.