Astanada 5 jylda 100 myń páter salynbaq

Memlekettik baǵdarlamalar aıasynda jáne jeke ınvestısııalar arqyly salynatyn barlyq jobalardy esepke alǵanda aldaǵy 5 jylda Astanada 10 mln sh.m. astam turǵyn úı salý kózdelip otyr. Bul 100 myńnan astam páter. Bul týraly búgin Astana ákimi Áset Isekeshev turǵyn úı qurylysyn damytý máselesi boıynsha qurylys kompanııalary ókilderimen kezdesý barysynda málimdedi. "Jylyna orta eseppen 2 mln. m2 turǵyn úı salynatyn bolady. Aǵymdaǵy jyldyń 10 aıynyń qorytyndysy boıynsha Astanada 1807 myń m2 turǵyn úı nemese 16 671 páter paıdalanýǵa berildi. Bul byltyrǵy jyldyń sáıkes kezeńindegi kórsetkishten 130%-ǵa artyq. Bul rette, bıýdjet qarajaty esebinen jalpy aýdany 189 myń m2 bolatyn 2 500 páter tapsyryldy", dep habarlaıdy elorda ákimdiginiń baspasóz qyzmetinen. Qazirgi ýaqytta 273 kóp páterli, kóp qabatty jáne az qabatty kommersııalyq turǵyn úılerdiń qurylysy júrip jatyr. Olardyń jalpy aýdany - 7 mln. 246 myń m2 (bul 75 myńǵa jýyq páter),  281 myń m2 (85 myń páter) jobalaný kezeńinde. Sonymen qatar, iske asyrylyp jatqan baǵdarlamalardyń sheńberinde bıýdjet kózderin tartý arqyly jalpy aýdany 1 mln. 400 myń m2, páter sany  23 myń bolatyn 37 turǵyn úı kesheniniń qurylysy júrgizilýde. «19 jyl ishinde Astanada 17 mln. sharshy metr turǵyn úı paıdalanýǵa berildi. Ústimizdegi jyly biz taǵy 2 mıllıon m2 astam baspanany tapsyrýdy josparlap otyrmyz. Turǵyn úı qurylysy kóleminiń jyl saıynǵy ósim qarqyny Memleket basshysy bergen tapsyrmalardyń sheńberinde memlekettik qoldaý baǵdarlamalaryn iske asyrýdyń arqasynda saqtalyp otyr. Biz álemniń jahandyq qalalarynyń damý tájirıbesin zerttep, aldaǵy perspektıvalarynyń jáne negizinen qalanyń baǵdarlamalyq qujatynda iske asyrý joldarynyń keshendi kórinisi ázirlendi. Qalanyń keleshektegi damýy ekologııalyq taza tehnologııalardy jáne qoǵamdyq keńistikterdi úılesimdi abattandyrýdy ózara baılanystyrý arqyly qarastyrylýda», - dep atap kórsetti Astana ákimi Áset Isekeshev.