Úsh medrese kolledj mártebesin aldy

Elimizde rýhanı bilim berý júıesi jańa baǵytta, ıaǵnı memlekettik baǵdarlama aıasynda júzege asady. Qazir saýatty dintanýshy maman daıyndaý mańyzdy másele. Sondyqtan Qazaqstandaǵy dinı qyzmetkerlerdi oqytýmen aınalysatyn toǵyz medreseniń úsheýine kolledj mártebesi berildi, dep habarlaıdy 24.kz. Bul týraly búgin «Zaıyrlylyq - Qazaqstandyq qoǵam turaqtylyǵynyń negizi» atty Respýblıkalyq dintanýshylardyń altynshy forýmynda din isteri komıtetiniń tóraǵasy Ǵalym Shoıkın málim etti. Kolledj deńgeıine ıe bolǵan dinı oqý oryndary memlekettik baǵdarlama boıynsha dástúrli dinı baǵytta bilim beredi. Orta bilim berý mekemeleriniń talabyna saı bolý úshin ǵylymı baǵytta da sabaqtar júredi. Bul elimizde biliktiligi joǵary dintanýshy mamandar tárbıeleýge jol ashady. Zaıyrly qoǵamdaǵy dinı ekstremızm men terrorızmniń aldyn-alýda memleket pen din bir múddege jumys isteý kerek deıdi sala mamandary. "Ol zaıyrlylyq qatyp qalǵan qaǵıdattar emes. Memleket dinniń arasyna aralaspaıdy, din memlekettiń arasyna aralaspaıdy. Biraq bir kezde syrtqy, ishki faktorlarǵa baılanysty memleket tikeleı dinge qamqorshy rolin atqarady. Bir ýaqyttarda qorǵanys máselesimen aınalysady. Bir kezeńderde oǵan járdem de jasaıdy" - deıdi Fılosofııa ǵylymdarynyń doktory Aıdar Ábýov.