OQO-ǵa halyqaralyq kompanııalar ınvestısııa quımaq

Ońtústik Qazaqstan oblysynyń ákimi Janseıit Túımebaev Shveısarııa, Fransııa men Armenııa memleketterinen kelgen iri kompanııalardyń quryltaıshylarymen kezdesti. Bul týraly OQO ákiminiń baspasóz qyzmeti habarlady. Jıynǵa «SASSTEX», «WKS Textile Solution» kompanııasynyń quryltaıshysy Gelıdjı Krıstıan, «SCI France» ınvestısııalyq kompanııasynyń quryltaıshysy Akobıan Graır, «Goldhein Investments» ınvestısııalyq kompanııasynyń quryltaıshysy  Varagıan Davıd, «Goldhein Investments» ınvestısııalyq kompanııasynyń ókili Tynybek Rıshat qatysty. Basqosý barysynda óńir basshysy oblystyń ınvestısııalyq múmkindikterin tanystyryp, óńirdiń áleýmettik-ekonomıkalyq damýyna serpilis beretin jobalardy júzege asyrýǵa nıetti árbir ınvestorǵa ákimdik tarapynan qajetti qoldaýlardyń jasalatynyn jetkizdi. Osy rette ákim sheteldik kásipkerlerdi zamanaýı jabdyqtalǵan maqta óńdeý zaýytyn qurý, jol qurylysy men mal sharýashylyǵy, teri óńdeý, sonymen qatar, aǵash-polımerli materıaldar óndirisiniń jelisin qurý syndy iri ınvestısııalyq jobalardy júzege asyrýǵa shaqyrdy. О́z kezeginde mártebeli meımandar Shveısarııa, Fransııa men Armenııa memleketterinde aýyl sharýashylyǵy men ónerkásip baǵytynda álemdik deńgeıde kóshbasshy bolyp tabylatyn birqatar jobalardyń bar ekenin aıtyp, osy syndy jobalardy Ońtústik Qazaqstan oblysynda da júzege asyrýǵa bolatynyn aıtty. Sondaı-aq, olar oblys aýmaǵyndaǵy jol qurylysy men teri, maqta, qoqys  óńdeıtin zaýyttaryn qurý jáne qurylys materıaldaryn shyǵarý,  mal sharýashylyǵyn damytý boıynsha jobalarǵa qyzyǵýshylyq tanytty. Atalǵan jobalardy damytýda tájırıbeleriniń mol ekendigine de toqtaldy. Sheteldik ınvestorlar jol qurylysy salasyn damytýda qazirgi zamanaýı tehnologııany paıdalana otyryp, talapqa saı  táýligine 5 shaqyrym jol sala alatyn múmkindikterin alǵa tartty. Oǵan jergilikti turǵyndardy da jumyspen qamtýǵa bolatynyn jetkizdi. Sondaı-aq, maqta óńdeý zaýytyn qurý salasyndaǵy tájirıbelerimen bólisti. Al mal sharýashylyǵyn damytýda Romanov tuqymdas qoılaryn ońtústikke jersindire otyryp mal basyn kóbeıtý arqyly et eksportyn arttyrý jobalary da tabysty iske asatynyna sendirdi. Ári ony BAÁ men Iran elderine ótkizý jumystaryn da ózderi uıymdastyrmaq. Ońtústik Qazaqstanǵa jasaǵan jumys sapary barysynda atalǵan kompanııa quryltaıshylary Shymkenttegi týrıstik-aqparattyq ortalyq pen jańadan ashylǵan «Front ofıs» jumystarymen tanysty. Sondaı-aq, «Ońtústik» arnaıy ekonomıkalyq aımaq pen ındýstrııaldy aımaqta bolyp,  birneshe kásiporyndardy aralap kórdi. Ońtústiktiń ınvestısııalyq múmkindikterin baǵdarlaǵan Fransııalyq, Shveısarııalyq jáne Armenııalyq ınvestorlar oblys ákimdigimen ortaq sheshimge kelýge ýaǵdalasty. Álemdik naryqta kóp jyldyq tájirıbesi bar «SASSTEX», «WKS Textile Solution», «SCI France» «Goldhein Investments»  seriktestigi keń aýqymdy, uzaq merzimdi jobalardy ázirlep, júzege asyrýmen aınalysatyn iri kompanııalar bolyp tabylady.