Bıyl 7 mln. tonna astyq eksporttaldy

Qazaqstan aǵymdaǵy jyldyń basynan beri shamamen 7 mln. tonna astyqty eksportqa shyǵardy. Bul týraly  Qazaqstandaǵy astyq naryǵynyń ashyqtyǵyn arttyrý jónindegi konferensııada elimizdiń Aýyl sharýashylyǵy vıse-mınıstri Gúlmıra Isaeva málim etti. «Aǵymdaǵy jyly biz mol ónim alyp, 23,7 mln. tonna astyq bastyrdyq. О́nimdilik gektaryna 15,4 sentnerdi qurady. Bul sońǵy jyldardaǵy rekordtyq túsim bolyp otyr. О́ńdelgennen keıingi taza salmaqtaǵy astyqtyń óndirilgen kólemi 21,7 mln tonna deńgeıinde bolady dep boljanýda», – dedi ol. Vıse-mınıstrdiń atap ótýinshe, bul kólem ishki suranysty tolyqtaı qanaǵattandyrýmen qatar, 9 mln tonnaǵa deıingi astyqty eksportqa shyǵarýǵa da múmkindik beredi. «Osy jyldyń basynan beri 10 qarashadaǵy málimetterge sáıkes astyqqa balama undy qosa alǵanda, shamamen 7 mln. tonna astyq eksportqa jóneltildi. Al bul ótken jyldyń sáıkes kezeńimen salystyrǵanda, shamamen 21 paıyzǵa artyq. Jalpy, qazaqstandyq astyq pen un eksportqa shyǵarylatyn dástúrli naryqtardyń qatarynda Orta Azııa elderi, Aýǵanstan, Iran, Ázerbaıjan memleketteri bar. Sonymen birge biz Soltústik Afrıka, Taıaý Shyǵys, Eýropalyq odaq elderi men Qytaıǵa da astyq jetkizý kólemin ulǵaıtýǵa nıettimiz», – dedi Isaeva.