1430 shaqyrym jáne 9 kún

Ofıser Shymkent – Astana aralyǵyn velosıpedpen júrip ótti Ońtústik Qazaqstan oblysy boıynsha Memlekettik kirister departamentiniń ekonomıkalyq tergeý qyzmetiniń ofıseri Sábıt Mustafaev Táýelsizdigimizdiń 25 jyldyǵy qurmetine Shymkentten Astanaǵa velosıpedimen bardy. Ol bul saparyn soltústik óńirlerdi aıaz qyspaı turǵanda jasap úlgerdi. Al bardy dep aıtar aýyzǵa ǵana ońaı, taspadaı kerilgen tas jolda ersili-qarsyly qıdalasqan mashınalar, jańbyr men jel, tóbeni tesken ashy kún, qarańǵy tún, ańqany keptirgen ańyzaq, bárinen ótýge týra kelgen. Ol 1430 shaqyrymdy 9 kúnde júrip ótti. – Árıne, jolda qıyndyqtar bolmaı qalǵan joq, – deıdi ofıser. – Qap-qarańǵy túnde velosıpedpen kele jatqanda túrli qorqynyshtar boldy. Sol kezde «Sábıt, óz eliń, óz jerińde júrip kele jatyrsyń, nemeneden tartynasyń», dep kóńilimdi bastym. Otanyma degen sezimim qanattandyrdy. Ata-baba armandaǵan táýelsizdikke árkim árqalaı úles qosady. Men memleketime degen qurmetimdi osylaı kórsettim. Sábıt Mustafaev ershikten tús­peıtin kánigi veloshabandoz emes. Kezekti eńbek demalysyn paıdalanyp, osy iske táýekel etken. Táý­elsizdikke qurmettiń úlken-kishi­si bolmaıdy. Ofıserdiń úlgisi osy. Baqtııar TAIJAN, «Egemen Qazaqstan» Ońtústik Qazaqstan oblysy