Agenttiktiń Memlekettik qyzmet salasyndaǵy baqylaý departamentiniń dırektory Qýanysh Japaqov qyzmetshilerdiń áriptesterimen, qol astyndaǵylarmen, basshylarymen jumys ýaqytyndaǵy qatynastary, sondaı-aq jumystan tys kezdegi jáne kópshilik aldyndaǵy minez-qulyq standarttary belgilengendigin erekshe atady. Áıtse de qyzmettik ádepti buzǵan memlekettik qyzmetshiler de jeterlik. Ádep jónindegi keńestiń usynysymen Mańǵystaý aýdandyq ákimdik apparatynyń basshysy Janatov mas kúıinde avtokólik júrgizgeni úshin qyzmetinen bosatylǵan. Sol sııaqty Aqmola oblysynyń Ádep jónindegi komıssııasynyń usynysymen Jarqaıyń aýdany Atrazın aýyldyq okrýginiń ákimi Muqanov ta jumystan shettetilipti. Qol astyndaǵy qyzmetkerlerine álimjettik tańytqany úshin Jambyl oblysy boıynsha Ádep komıssııasynyń usynysymen Taraz qalasy ákiminiń orynbasary Aqaevqa qatań sógis berilgen.
Osyndaı óreskeldikke barǵan jáne qyzmet kóligin jeke basyna paıdalanǵan Qostanaı oblysy, Uzynkól aýdany ákimdigi apparatynyń basshysy Mirjaqypovqa sógis jarııalaý jolymen tártiptik jaýapkershilik belgilenipti. Jáne de qoǵam tarapynan aıtylǵan synǵa jaýap bermegeni, naqty aıtqanda, sybaılas jemqorlyq áreketke bardy degen aıypty bir aı ishinde teriske shyǵarmaǵany úshin Qaraǵandy oblysy, Osakarov aýdany Telman aýyldyq okrýginiń ákimi Balıevanyń qyzmeti tómendetilgen. Jalpy, ústimizdegi jyldyń 9 aıynda 3 535 memlekettik qyzmetshi jáne olardyń 10 paıyzy ádep qaǵıdalaryn buzǵany úshin tártiptik komıssııa usynysymen jaýapqa tartylǵan.
Tarqatyp aıtqanda, 8 memlekettik qyzmetshiniń laýazymdyq qyzmeti tómendetilgen, 17-si qyzmetinen bosatylǵan. Ádep jónindegi ýákilder barlyq ortalyq memlekettik jáne jergilikti atqarýshy organdarda engizilgendigin aıta ketken oryndy. Olardyń negizgi mindetteriniń biri – memlekettik qyzmetshilerdiń Ádep kodeksin saqtaýyn qadaǵalaý. Eger memlekettik qyzmetshi kodeks talaptaryn buzsa, onda Ádep jónindegi keńes álgi sheneýniktiń tártiptik isin qarap, jaýapkershilikke tartýǵa usynys bere alady. Jyl basynan beri Ádep jónindegi keńes 753 máseleni qaraǵan. Engizilgen 207 usynystyń 95 paıyzy oryndalǵan. Usynymdarǵa sáıkes, 344 memlekettik qyzmetshi tártiptik jaýapkershilikke tartylsa, sonyń ishinde 54 paıyzy qyzmettik ádep talaptaryn buzǵan.
Asqar TURAPBAIULY, «Egemen Qazaqstan»
