Saqtyq sharalary pysyqtaldy

Bıyl qar jaqsy tústi. Resmı derekterge súıensek, ózend­er­de­gi muzdyń  qalyńdyǵy 40 santımetr shamasynda. Onyń ústine, sınoptıkterdiń habaryna qara­ǵanda, naýryz aıynyń ekinshi onkún­di­ginde kún 10 gradýsqa deıin jyly­nýy múmkin. Bol­jamǵa sensek, qardyń kúrt erıtin túri bar.  Aqtóbe qalasynyń ákimi Arhımed Muhambetovtiń tóraǵaly­ǵy­men ótken sý tas­qynynyń aldyn alý sha­ra­laryna baıla­nys­ty májiliste  kóktemgi sý tas­qynyna daıyn­dyq máseleleri  taǵy bir ret pysyqtaldy. Qazir qala kóshelerin qardan tazalaý jumystary jalǵasýda.  Áli de 70 kósheni tazalaý jos­par­lanyp otyr.  Qys bastal­ǵa­ly  40 myń tonna qar shyǵaryl­ǵan.  Kóktemgi sý tasqyny kezindegi sharýalarǵa  50 sý soratyn tehnıka, 3 ekskavator, 70 qum tasıtyn  kólik, 8 býldozer, ár­qaı­sysynyń syıymdylyǵy 20 tekshe metr 4 jyljymaly sorǵy stansasy  jáne basqa da kólik quraldary men 3 myń tekshe metr qum daıyndalǵan. Sý tasqy­ny­nyń aldyn alý sharalaryna 22 mıllıon teńgeden astam qarjy bólinipti. Qala mańyndaǵy   negizgi úsh sý qoımasynyń kóktemgi qar sýyn qabyldaý jáıi de tııa­naq­tal­dy. «Aqtóbesýsharýashylyǵy» mekemesiniń dırektory Bekzat Ná­metovtiń málimdeýinshe, eń úl­ken  Qarǵaly sý qoımasynda qazirgi kúni 42 mıllıon tekshe metr sý bar. Onyń jalpy syı­ym­dylyǵy – 280 mıllıon tekshe metr. Sondyqtan áli de 240 mıllıon  tekshe metr sýdy qabyldaı alady. Al Aqtóbe sý qoımasy 145 mıllıon tekshe metr sýdy qabyldasa, Sazdy sý qoı­masyna  5 mıllıon tekshe metr sý ketedi. «Aqtóbe sýdan qutqarý qyz­meti» mekemesiniń bastyǵy Qa­symjan Baısadaqov sýdan qut­qarý  brıgadalarynyń kók­tem­gi sý tasqyny jumys­taryna saqa­daı-saı daıyn­dyǵyn má­limdedi. Tótenshe jaǵdaılar týyndaǵan  jaǵ­daıda qutqarý qaıyqtary, janar-jaǵar maı, dári-dármek­ter, basqa da qa­jetti zattar jetkilikti. Kóktemgi sý tasqynynyń aldyn alý is-sharalaryn júr­gi­zý úshin qurylǵan arnaıy ko­mıs­sııanyń quramy bekitildi. Jumys jospary jasalyp, 8 je­del top jasaqtaldy. Jedel toptar ózderine bekitilgen aı­maq­tarda  táýlik boıyna kezekshilik uıymdastyryp,   erigen qar sýynyń qaýipti jaǵdaıyn qadaǵalaıtyn bolady. Qazaqta «Saqtansań saq­tar­­myn» degen sóz bar. О́tken jylǵy Shyǵys Qazaqstan jáne Almaty oblystaryn­daǵy sý tasqyny kezindegi oqı­ǵalar tilsiz jaýdan ár­qashan saqtanýdyń ashy sa­baqtary boldy. Son­dyqtan da qala basshylarynyń kóktemgi sý tasqynynan esh­kim­niń zardap shekpeýin osy bastan oılastyrýy quptarlyq is. Satybaldy SÁÝIRBAI. Aqtóbe oblysy.