Árkimniń óz muqtajy bar

Prezıdenttikten úmitker Mels Eleýsizovtiń qazir sharýasy qat-qabat. Keshe ǵana Arqany aralap, Astanaǵa da soǵyp, onda óziniń saıası tuǵyrnamasymen jurtty tanystyryp qaıtyp edi, endi Almatyda ony biraz jumys kútip turǵan. Oǵan tek demalys kúnderin ǵana paıdalana alady, dúısenbiden eldiń shyǵysyna sapary bar. Senbi kúni qalanyń Bostandyq aýdanynda boldy. Bolǵanda, qala tur­ǵyn­darymen kezdesti. Aýlalarǵa baryp, jurtpen áńgimelesti. Ásirese, Jandosov kóshesindegi bir úıdiń turǵyn­da­ry­men aradaǵy áńgime óte qyzý ótti. Olar ózderiniń páterleriniń kúıi ketkenine, jóndeý jumystary júrgizilmeıtinine shaǵymdandy. Al bul jumyspen aına­ly­sýǵa tıisti páter ıelenýshiler koope­ra­tıviniń (PIK) tóraıymy G.Tóle­ge­nova ýaqytyn turǵyndarmen sottasýǵa jiberetin kórinedi. О́ıtkeni, osy kúnge deıin páter ıelenýshiler sotqa 300-deı shaǵym túsiripti. Ákimshilik oryndary, sot, prokýratýra qoǵamdyq uıymnyń jumysyna aralaspaıtynyn málim­de­gen. Tóraǵany ózderiń saılap alǵan­syń­dar, deıtin kórinedi. Turǵyndar aı saıyn úıdi kútý jumysyna aqsha tólegenmen, shatyrdan sý aǵyp, úı tólesine sý tolyp ketedi eken. Úmitker Eleýsizov pikir aıtqysy keletinderdiń bárin tyńdady. Sonan soń ǵana óz pikirin bildirdi. Sizderdiń sózderińizge qaraǵanda, talaptaryńyz oryndy, zań sizder jaǵynda sııaqty. Biraq ádil bolý úshin ekinshi jaqty da tyńdaǵanymyz jón bolar, dedi úmitker. Bylaı keliseıik, dedi ol: 2 sáýir kúni osynda Tólegenova hanymdy da shaqyryp, áńgimeleseıik te, sodan bir qorytyndyǵa keleıik. Jınalǵandar bul usynysqa kelisti. Rasynda da, turǵyn úıler jaıy barlyq jerde de ótkir máselege aına­lyp otyr. Elimizde árbir úshinshi úı qaýipti jaǵdaıda eken, ony almastyrý qajet. Al sol úılerge kútimdi de jańasha júrgizgen jón ekeni aıtylýda. PIK ózin aqtaı qoımady. Bul ha­lyq­tyń qamyn oılaıtyn árbir azamatty tolǵandyrady. Sol kúni «Tabıǵat» ekologııalyq odaǵynyń tóraǵasy Mels Eleýsizov óziniń saılaýaldy shtabynda «Jer silkinisi jáne onyń saldary» atty má­jilisin ótkizdi. Bir jaǵy oǵan Japo­nııa­daǵy asa aýyr jer silkinisi de sebep bolǵandaı. Sý tasqyny, alapat quıyndar, jer silkinisterine kúni buryn daıyn turýymyz kerek. «Saqtanǵan adam – qıyndyqqa qarsy qarýlanǵan adam» degen naqyldy  «halyq ekology» jıi qaıtalady. Biraz ózgeris aıǵa baılanysty ekenin ýaqyt kórsetip otyrǵanyn ol alǵa tosty. Sol aıdyń bizdiń planetamyzǵa jaqyndaǵan kezderinde biraz tosyn oqıǵalar bolyp turǵan. 19 naýryzda da aıdyń jerge jaqyndaýy bolady. Saqtansaq, artyqtyǵy joq. Klımattyń jylynýyna qarsy sýtegi gazdarynyń aýaǵa jiberilýin shekteý jolynda júzege asyratyn sharalar kóp. Al sol aýamyzdy tazalaýda jasyl jelektiń orny bólektigin aıta kelip, jınalǵandardy úmitker 20 naýryz kúni aǵash egýge shyǵýǵa shaqyrdy Árıne, oǵan ózi bas bolyp barady. Mamadııar JAQYP. Almaty.