Saılaý men tańdaý

Aqmeshittiń aspany qansha kúnnen beri túnerip turǵan. Jaýaıyn dep turǵan jańbyrdy jyndy jel kelip, qýyp ketedi. Keshe tańerteńnen bastap kebersip jatqan jerge jańbyr tıdi. Aınala jadyrap sala berdi. Kóktemniń qudireti degen osy shyǵar. Úzdiksiz jaýǵan jańbyrǵa qaramastan, ortalyq alań halyqqa lyq toldy. Jalyndy urandar jańbyrmen birge aspanda qalyqtap tur. Bul – aldaǵy bolatyn saılaýda prezıdenttikke kandıdat Nursultan Nazarbaevtyń kandıdatýrasyn qoldaýǵa kelgen adamdar edi. Mıtıng tórine «Nur Otan» halyqtyq-demokratııalyq partııasy Tóraǵasynyń birinshi orynbasary, prezıdenttikke kandıdat N.Nazarbaevtyń respýblıkalyq qoǵamdyq shtabynyń jetekshisi Nurlan Nyǵmatýlın bastaǵan bir top azamat kóterildi. Olardyń qatarynda Qýanysh Sultanov, Bekbolat Tileý­han sekildi Parlament depýtattary, Qa­zaq­stan Jazýshylar odaǵynyń tóraǵasy Nurlan Orazalın, Sıdneı Olımpıadasynyń chempıony Ermahan Ybyraıymov, Aýǵan soǵysy ardagerleriniń respýblıkalyq asso­sıa­sııasy tóraǵasynyń orynbasary Baqyt­bek Smaǵul sekildi elge tanymal azamattar bar-tyn. Sondaı-aq jıynǵa «Qazaq­stan-2020» jalpyulttyq demokratııalyq kúshter koalısııasynyń ókilderi de qatysty. Mıtıngiden keıingi jıyn oblystyq Nartaı Bekejanov atyndaǵy drama teatrynda jalǵasty. Oǵan oblys jurtshylyǵy, úki­mettik emes uıymdardyń ókilderi, aqsaqal-ardagerler men jastar keldi. Alǵashqy sózdi «Nur Otan» HDP Tóraǵasynyń birinshi orynbasary Nurlan Nyǵmatýlın aldy. – Alashtyń anasy atanǵan qasıetti de kıeli Syr óńirinde bas qosyp otyrmyz. Dalasy darhan, halqy jaısań jurttyń qushaq jaıyp qarsy alǵanyna qýanyshtymyz. 90-jyldar­dyń bas kezi barlyǵymyzdyń esimizde shy­ǵar. Jumys joq, dúken sóreleri bos bolyp turǵan ýaqytty eshkim umyta qoımas. Biraq kóp uzamaı elimiz álemdegi áleýetti memle­ketterdiń birine aınaldy. Jańa qurylystar salyndy. Jumys oryndary ashyldy. Munyń bári el úshin, memlekettiń bolashaǵy úshin jasalǵan jumystar bolatyn. El Táýel­sizdiginiń 20 jyldyǵy qarsańynda saılaý ótkeli otyr. Osy oraıda elin, jerin qadir­leıtin árbir azamat prezıdenttikten úmitker Nursultan Nazarbaevqa daýys beredi dep oılaımyn, – dedi Nurlan Zaırollauly. Jalpy, Syr óńiri – sóz qudyretin túsine­tin, túsinip qana qoımaı, onyń tereńine boı­laıtyn óńir. Nursultan Ábishulynyń kandıda­týra­syn qoldap kelgen azamattardyń qaı-qaısysy bolmasyn tilge sheshen, ot aýyzdy, oraq tildi azamattar edi. Birin-birinen bólip qaraý múmkin emes. Partııa Tóraǵasy­nyń birinshi orynbasarynan keıin sóz alǵan senator Qýanysh Sultanov, Nurlan Orazalın, Ba­qyt­bek Smaǵul men Bekbolat Tileýhan kóp­shilikti serpiltip, sanaǵa salmaq salar oıly áń­gi­me­ler órbitti. Qazaqstan koreıleri asso­sıa­­sııa­synyń prezıdenti Roman Kımniń baıan­damasy da halyqqa maıdaı jaqty. Sózin qazaq tilinde bastaǵan ol memlekettik tildi úırenip júrgenin aıtty. Sondaı-aq aldaǵy ýaqytta Qazaqstanda qazaq tili degen problemanyń bolmaıtynyna senetinin jetkizdi. Qyzylorda topyraǵyna kelgen qonaqtar budan keıin birneshe topqa bólinip, oblys jurtshylyǵymen kezdesýge attandy. Ondaı kezdesýler Asqar Toqmaǵambetov atyndaǵy mádenıet saraıynda jáne Syrdarııa aýdanynda ótti. Erjan BAITILES. Qyzylorda oblysy.