BQO-da kásipkerlikti qoldaýǵa 1,5 mlrd teńge bólinedi

Orta jáne shaǵyn bıznestiń damýyna jol ashatyn tetikter qarastyrylǵan jıynda oblys basshysy A. Kólginov ótken jyly bul baǵyttaǵy jobalar tıimdi júzege asqanyn, eń bastysy, aýdandar men eldi mekenderdi qamtyǵanyn atap ótti, dep habarlady oblys ákimdiginiń baspasóz qyzmeti. Bıyl da sharýaǵa beıim azamattar úshin úlken múmkindikter ashylmaq. Sebebi osy jyly oblys ákimdigi men «Damý» qory 1,5 mlrd. teńge qarjy bólip, ol soma qala men aýdandarǵa 8,5 paıyzben nesıe retinde beriledi. Ár kásiporynnyń 50 mln. teńgege deıin qarjy alýyna múmkindigi bar. Al oblys ákimdigi men óńirlik kásipkerlik palatasy 600 mln. teńge bólip, aýyldaǵy aǵaıyn úshin 7 paıyz mólsherlemede nesıe berýdi qarastyrmaqshy. Aýdandaǵy kásiporyndarǵa 18 mln. teńgege deıin qarjy berý josparlanýda. Sondaı-aq bıyl «Bıznestiń jol kartasy – 2020» bıznesti qoldaý men damytýdyń biryńǵaı baǵdarlamasy aıasynda jeke kásipkerlikti qoldaýǵa 1,6 mlrd. teńge qarjy  qarastyrylǵan. Aıta keteıik,  Batys Qazaqstan oblysy aýyl sharýashylyǵyna qolaıly óńir bolǵandyqtan, bıyl oblys boıynsha 500 bordaqylaý alańyn  salý  josparlanýda. Osy jyly bólinetin qarjy jeke kásipkerler men jańa kásipti qolǵa alatyn batysqazaqstandyqtar úshin úlken qoldaý bolmaq. Bul jobalar óz kezeginde jańa jumys oryndarynyń ashylýyna da  jaǵdaı týǵyzady.