Saǵyntaev «Nurly jol» jobalaryn qarjylandyrý josparyn qaıta qaraýdy tapsyrdy

Úkimet otyrysy barysynda QR Premer-Mınıstri Baqytjan Saǵyntaev «Nurly jol» baǵdarlamasynyń jobalaryn qarjylandyrý josparlaryn qaıta qaraýdy tapsyrdy, dep jazady primeminister.kz. QR Premer-Mınıstri Baqytjan Saǵyntaev jalpy 2016 jylǵy baǵdarlamalardyń negizgi sharalary atqarylǵanyn, sonymen qosa jyl qorytyndysy boıynsha belgili ıgerilmegen qarajattar bar ekenin aıtty. B. Saǵyntaev ótken jyldyń qyrkúıeginde Úkimet otyrysynda baǵdarlamalardyń ákimshilerine ýaqytyly ıgerý men jobalardyń qatań baqylaýda iske asyrylýy týraly tapsyrma bergenin eske saldy. «Sondyqtan da ıgerilmeýdiń negizgi sebebi ákimderdiń tarapynan tıisti baqylaýdyń bolmaýynan dep esepteımin. Taǵy bir másele – bólingen qarajatty josparlaý sapasy men ıgerýdiń merzimi. Qarjylandyrýdyń eki jyldyq josparynda edáýir kólem ekinshi jyldyń sońyna qoıylǵan, sol sebepti muny qalaı retke keltirýge bolatyny týraly oılaný kerek. Sondaı-aq, ıgerilmeý qaýipi bar sharalar boıynsha qarajatty qaıta bólý usynystaryn engizý qajet», - dedi B. Saǵyntaev. Sonymen qatar QR Premer-Mınıstri Baqytjan Saǵyntaev mınıstrlerge oblys ákimderiniń halyqpen esep berý kezdesýlerine qatysý úshin óńirlerdi aralaý kezinde mindetti túrde «Nurly jol» baǵdarlamasynyń negizgi nysandarynyń qurylys barysymen tanysyp, óz esepterinde sol týraly atap ótýdi tapsyrdy.