As mázirinde – afrıkalyq laqa

Brazılııalyq kofeni jaqsy kóretin jurt kóp. Biraq, naǵyz tazasyna kópshiliginiń qoly jete bermeıdi. Sondyqtan Shymkenttiń bir isker azamaty sonaý Brazılııadan sapaly shıkizatyn aldyryp, tańdaýly sor­tyn daıyndaıtyn seh ashqan. Sol suryp, sol dám. Qant dıabetine shaldyqqan adamdarǵa ósimdik japyraǵynan daıyndalatyn sháı kóp járdem beredi eken. Qazaqstanda óspeıtin osy shópti Tólebı aýdanynyń bir azamaty jylyjaıda ósirip, daıyn ónimge jetkizdi. Samıdýlla Temirbekov degen Tólebı aýda­nynyń taǵy bir azamaty shaǵyn haýyzynda afrıkalyq balyq ósirip jatyr. Bizde jaıyn, laqa dep atalatyn balyqtyń bul túri jaǵdaıyn kelistirse mol paıda beredi eken. Mamandyǵy ustaz Afrıka laqasy týraly qyzyq málimetterdi áleýmettik jeliden oqyp, ósirip kórýge qyzyǵýshylyǵy oıanǵan. Shabaqty aldyrý úshin muhıt jaldap, saharadan erni kezerip Afrıkaǵa barýdyń qa­jeti joq, ósirip jatqan sharýashylyqtar bar. Búginde úı irgesindegi haýyzda 11 myń shabaq ósirilip jatyr. – Bular jemnen góri etti jaqsy kóredi, – deıdi Samıdýlla. –Tabıǵatymyz Afrıkaǵa qaraǵanda, qataldaý bolǵandyqtan haýyzdyń astyna jylý júıesin júrgizip, qalypty jylý ustap otyramyz. Baǵyp, kútýdiń qyr-syryn meńgerip aldyq. Balyqtar toq bolsa jarysyp júzedi, bir-birimen oınaıdy. Ash bolsa kóńil kúıleri kelispeı, bir orynda tura beredi. Ettiń de maıy azyn jaqsy kóredi. Kúnine bir qunan qoıdyń salmaǵyndaı et jeıtin jyrtqysh balyqtardan paıda túspese kásipkerdiń ósirmeıtindigi belgili. Eki-úsh aıdan soń haýyzda ósirilip jatqan 11 myń laqa shabaqtyń árqaısysy kásipkerge úlken tabys ákeleri haq. Kásipkerlik mek­tebinen kómek alyp otyrǵan azamat ózine de, elge de paıdaly kásip tapty. Baqtııar TAIJAN, «Egemen Qazaqstan» Ońtústik Qazaqstan oblysy