1963 jyly ashylǵan osy ýnıversıtette ár saladaǵy tańdaýly mamandar ultymyzdyń folklorlyq muralarynan bastap sol zamandaǵy asa iri tulǵalarǵa deıingi aralyqtaǵy búkil ádebı, mádenı, ǵylymı shyǵarmashylyqty qamtıtyn 500-den asa leksııa oqypty.
Osy ýnıversıtettiń qolǵa alýymen 70-jyldarǵa deıin óz ólkesinen árige tanyla qoımaǵan Syr boıynyń jyraýlyq dástúri búkil elimizge málim bolyp, keń taraǵan. Osy ýnıversıtettiń bastaýymen aıtys óneri jandanǵan. Jyrshylyq, termeshilik ónerdiń, shertpe kúıdiń baǵy janýyna, halyq kompozıtorlarynyń respýblıka kóleminde tanylýyna zor eńbek etken ýnıversıtettiń basynda akademık Rahmanqul Berdibaı turdy.
Bir ǵana mysal, keńes zamanynda ekeýara aıtystyń qandaı túrinde de oqý oryndarynyń, basqa da kishigirim sahnalarǵa shyqqan juptardyń qaǵazǵa qarap aıtysqanyn kózi kórgen adamdar áli bar aramyzda. Eger aıtyskerler búginde qolma-qol janynan sýyryp shyǵaryp aıtyp júrse, bul janrdyń jaıqalǵanyn, damyǵanyn kórsetedi. «Bir óleńi bir eldiń murasyndaı» demekshi, bir ǵana qoǵamdyq qyzmetiniń ózinde halqyna ólsheýsiz eńbek etken Rahmanqul Berdibaı sııaqty akademıkterdiń ǵylymı murasy týraly aıtý, jazý úshin tańdy tańǵa urý kerek ekenin ózińiz de paıymdaı berińiz. Biraq, olardyń ǵylymı murasyn da, mádenıetimizge sińirgen ólsheýsiz eńbegin de nasıhattaý, keıingi jastardyń sanasyna quıý paryz bolyp qala bermek.
Osy oraıda L.N.Gýmılev atyndaǵy Eýrazııa ulttyq ýnıversıteti M.Jumabaev atyndaǵy ádebı birlestiktiń «Alqa» klýby uıymdastyrǵan «Tolaǵaı tolqyn taǵylymy» atty ǵylymı semınardyń stýdent-jastarǵa bergen áseri mol boldy. Tolaǵaı tolqyn degenińiz osy – Rahmanqul Berdibaı, Qajym Jumalıev, Músilim Bazarbaev, Zeınolla Qabdolov, Serik Qırabaev, Nyǵmet Ǵabdýllın syndy akademıkter men professorlardyń tizimi bolyp jalǵasa beredi. Jáne bulardyń barlyǵy bıyl toqsan jasqa shyǵyp otyr. Olardyń halqymyzdyń ádebıetine, mádenıetine sińirgen ólsheýsiz eńbekteri jaıynda ýnıversıtettiń professorlary keńinen tolǵady.
Aıgúl SEIILOVA,
«Egemen Qazaqstan»
