Bıyl Astanada uıymdastyrylatyn mańyzdy sharaǵa qatysýshy memleketterge tıesili pavılondardyń aýmaǵy 78 myń sharshy metrdi quraıdy. Jalpy, kórmede halyqaralyq 52 jeke jáne 6 biriktirilgen pavılon bolady. Eń iri pavılondardyń biri kúngeıdegi kórshimizdiń enshisinde. Onyń aýmaǵy, eki qabatty qosqanda, 2 myń sharshy metrge jetip jyǵylady. Búginde atalmysh alańda qurylys jumystardy qyzý júrgizilýde.
Qytaılyqtar kórmede «Bolashaq energııasy. Jasyl jibek joly» taqyryby aıasynda energetıka salasyndaǵy ınnovasııalyq tehnologııalardy kórsetpek. Sol eldiń halyqaralyq saýda palatasy dırektory, Ulttyq pavılon konstrýktıvti tobynyń basshysy Dje Djıeniń aıtýynsha, QHR-dyń EKSPO-2017 kórmesine qatysýǵa degen qulshynysy joǵary. «Pavılonymyzdyń aýdany óte úlken. Onyń aýmaǵy 1053 sharshy metrdi quraıdy. Qazaqstan tarapy tapsyrǵan pavılondy qabyldap aldyq. Bizge tıesili aýmaqtaǵy qurylys jumystary jospar boıynsha júrgizilýde. Qurylys mamyr aıynyń sońynda aıaqtalady», deıdi ol.
Dje Djıe Qytaı pavılonynda qandaı ınnovasııalyq tehnologııalar qoıylatynyn da jetkizdi. Bul aýmaqta Aspanasty eliniń jasyl energetıkada jetken jetistikteri, balamaly energetıka salasyndaǵy ınnovasııalyq tehnologııalar kópshilik nazaryna usynylady. Búginde eń iri 10 kompanııa osy salada jumys istep jatqan kórinedi. Al EKSPO-2017 kórmesine 25 qalanyń kásipkeri shaqyrylǵan.
Avstrııa memleketiniń pavılonyn tanystyrǵan sol eldiń Qazaqstandaǵy elshisi Gerhard Saıller jumystardyń kórmege deıin aıaqtalatyndyǵyn alǵa tartty. «Pavılonymyz kórme ashylǵanǵa deıin daıyn bolady. Bizdiń halyqaralyq sharadaǵy taqyrybymyz «Aqyl, júrek, denedegi kúsh» dep atalady. Avstrııa energııanyń 37 paıyzyn sýdan, 10 paıyzyn jelden, al qalǵanyn bıomassadan alady. Pavılonymyzdyń quny 5 mıllıon eýrony shamalaıdy. Aýmaǵy da shaǵyn emes, 900 sharshy metrdi quraıdy», dedi ol.
Elshi Avstrııa pavılonynyń negizgi ereksheligin de atap ótti. «Elimizde arnaıy konkýrs ótkizgen bolatyn. Nátıjesinde VM arhıtektorlyq toby jeńiske jetti. Olar EKSPO-2017 kórmesindegi Avstrııa pavılonynyń dızaınyn jasady. Biz mádenı is-sharalar da uıymdastyramyz. Sonymen qatar, kórme aýmaǵynda qonaqtar úshin arnaıy demalatyn oryn bolady», dedi G.Saıller.
Baspasóz týry barysynda «Astana EKSPO-2017» UK» AQ Halyqaralyq qatysýshylarmen baılanys departamentiniń dırektory Ilıa Orazaqov kórme qaýipsizdigin saqtaý maqsatynda tıisti jumystardyń atqarylyp jatqandyǵyn áńgimeledi. EKSPO-2017 kórmesine qatysýǵa nıet bildirgen 115 memlekettiń 103-ine pavılon berildi. 12 pavılon tapsyrylýǵa daıyn. Osy aıdyń sońyna deıin barlyq kórme aýmaǵyn ıelerine ótkizetin bolamyz. Elderdiń talap-tilekterin de eskerýdemiz. Máselen, keı memleketter ózderiniń pavılony úshin elektr qýatyn kóbeıtýdi suraıdy. Keıbiri óz aýmaǵyna kúrdeli konstrýksııalardy qoıýǵa ótinish aıtýda. Qaýipsizdikti saqtaý maqsatynda bul talaptar qanaǵattandyrylǵan joq», dedi dırektor.
Ashat RAIQUL, «Egemen Qazaqstan»
