Almaty qalasy kásipkerleriniń jyl saıynǵy konferensııasynda «Atameken» UKP Basqarma Tóraǵasynyń orynbasary Tólemis Shotanov Almaty qalasyndaǵy kásipkerlik damýynyń artyqshylyqtaryna toqtaldy, dep jazady palata.kz.
Tólemis Shotanovtyń aıtýynsha, Almatyda 160 885 jumys istep turǵan shaǵyn jáne orta bıznes sýbektisi bar. Sońǵy bes jylda sýbektiler sany eki esege deıin ósken. Degenmen, byltyrǵy jylmen salystyrǵanda 14% azaıǵan.
Almaty qalasy ShOB ekonomıkalyq belsendi turǵyndarynyń úshten eki bóligin jumyspen qamtyp otyr, al ekonomıka qurylymyndaǵy ShOB úlesi 34%-ǵa jetken.
Almatydaǵy shaǵyn jáne orta bıznes qyzmeti saýda salasynda –34%, ózge de qyzmet kórsetýlerde – 16,3%, jyljymaıtyn múlikpen operasııalar – 11,3% qurady.
Sonymen qatar kásipkerler konferensııasynda «Atameken» UKP Basqarma Tóraǵasynyń orynbasary Tólemis Shotanov Almaty qalasy ákimdigi men Kásipkerler palatasynyń birlesken qyzmetine de toqtalyp ótti.
Byltyrǵy konferensııada kóterilgen máselelerdiń nátıjesinde Almaty qalasy ákimdigimen birlesken kelisimderge qol qoıylǵan, 22 kelisimniń 20-synda atarlyqtaı nátıjege qol jetkizilgen.
Sonymen qatar aǵymdaǵy jylda kásipkerliktegi jıi qaıtalanatyn máselelerdi anyqtaý jumystary jalǵasyn taýyp keledi.
Sońǵy zertteýler nátıjesinde Almaty bıznesin memlekettik satyp alýlar men ótkizý, ınfraqurylym men jer resýrstaryna, saýda oryndary qoljetimdilik, mamandar daıyndaý men adamı kapıtaldyń damytý, bıznes júrgizý boıynsha keńes alý men ınjenerlik-kommýnıkasııalyq jelige qosylý jáne t.b. máseleler tolǵandyryp keledi.
«Satyp alýlar júıesi arqyly Almatyda otandyq taýar óndirýshiler qoldaýda memlekettik organdar men ulttyq kompanııalardyń satyp alýlarynda jergilikti qamtý úlesin qamtamasyz etýdi monıtorıngileıtin arnaıy Komıssııa qurylyp, 590 otandyq taýar óndirýshiler, 10 memlekettik organ men 295 vedomstvoǵa baǵynyshty mekemeler qamtylǵan 11 jıyn ótkizilgen. Nátıjesinde otandyq balamasy bolsa da, 10,2 mlrd teńshe somasyna ımporttyq taýar satyp alýdyń 82 deregi anyqtalǵan. 2016 jyldyń qorytyndysy boıynsha Almatydaǵy memlekettik organdardyń satyp alýlarynda otandyq úles 28%-dan 54%-ǵa deıin eki esege artqan. Al memlekettik satyp alýlardaǵy oryndalǵan kelisimshart sany 2016 jyly 25,7 myń bolyp, jalpy 22,6 mlrd teńge somany qurady», – dedi «Atameken» UKP Basqarma Tóraǵasynyń orynbasary Tólemis Shotanov.
Tólemis Shotanov memlekettik satyp alýlar men kvazımemlekettik satyp alýlardaǵy baqylaýdyń joqtyǵy ózekti másele ekenin alǵa tartyp, jobalyq-smetalyq qujattardy daıyndaýda otandyq taýar úlesin qamtamasyz etý boıynsha Almaty qalasy «Memsaraptama» bólimshesi men Palata arasynda kelisimge qol qoıý qajettiligine basa nazar aýdardy.
Sonymen qatar, qosalqy merdigerlik mekemelerge posttenderlik baqylaýdyń júrgizilmeıtinin aıtty. Osyǵan oraı Qurylys basqarmasy men Kásipkerler palatasy arasynda arnaıy kelisimge qoıý kerektigin usynyp, posttenderlik baqylaý mehanızmin qoldaný arqyly otandyq úles kólemin arttyrýdy qadaǵalaýǵa bolatyndyǵyn erekshe atap ótti.
Munymen qosa, tehnıkalyq sıpattamasy tolyq jazylǵan otandyq taýar óndirýshiler tizimin daıyndap, www.ugask.kz saıtynda jarııalaýdyń mańyzyn túsindirip ótti. Bul ádis otandyq ónimdi qoldaný kórsetkishin baqylaýǵa múmkindik berip qana qoımaı, taýar jetkizýshilerge aqparat qoljetimdiligin qamtamasyz etedi.
Almaty qalasy kásipkerler konferensııasynda «Atameken» UKP Basqarma Tóraǵasynyń orynbasary Tólemis Shotanov bıznes úshin ınfraqurylymǵa, saýda oryndaryna qoljetimdilik adamı kapıtaldy damytý máselelerine toqtaldy.
«Búginde Almaty qalasynda tehnıkalyq jáne kásiptik bilim berý júıesimen 82 kolledjde 61 myń bilim alýshy bar. Onyń 34-inde dýaldy bilim berý ádisi qoldanylyp, 2296 stýdent qamtylǵan. Sonymen qatar 1782 kásiporynǵa saýalnama júrgizilgen. Nátıjesinde, qyzmet kórsetý, jeńil jáne taǵam ónerkásibi, qurylys, jıhaz jasaý salalarynda mamandar qajettiligi anyqtalǵan. Osyǵan oraı maman daıyndaý prosesiniń tıimdiligin arttyrý úshin Almaty qalasyndaǵy kolledjder reıtıingi jasap, bilim berýdegi memlekettik tapsyrys kezinde eskerý kerek. Sondaı-aq, Almaty qalasy Bilim basqarmasyna jergilikti bıýdjet esebinen memlekettik bilim berý tapsyrysyn ornalastyrýda jumys berýshilerdiń suranysyn qanaǵattandyrý úshin bilikti jumysshylardy daıyndaýdy 80%-ǵa arttyryp, orta býyn mamandaryn daıyndaýdy 20%-ǵa azaıtý qajet», – dep Basqarma Tóraǵasynyń orynbasary usynysyn ortaǵa saldy.
Almaty qalasynda eki Kásipkerlerge qyzmet kórsetý ortalyǵy jumys isteıdi, onda 2016 jyly 7 471 qyzmet kórsetilgen. Munymen qosa, Kásipkerler men ınvestorlarǵa qyzmet kórsetý ortalyǵy ashylǵan. «Atameken» UKP Basqarma Tóraǵasynyń orynbasary aǵymdaǵy jyly barlyq Kásipkerlerge qyzmet kórsetý ortalyqtary onlaın-rejımge aýystyrylýy josparlanyp otyrǵanyn habarlady. KQKO ınjenerlik kommýnıkasııalar boıynsha da qyzmet kórsetiledi.
Bul júıe boıynsha memlekettik organdar mamandary kásipkerden ótinim alǵannan keıin 5 kún ishinde tehnıkalyq sıpattama men ruqsat qaǵazdaryn alý boıynsha qyzmet kórsetetin bolady. Bul pozısııalar «Doing Business» halyqaralyq reıtıngindegi kórsetkishterdi jaqsartýǵa da múmkindik beredi.
«Bıznestiń kóptegen bastamalary qoldaý tapty jáne Elbasy Joldaýynda aıtyldy, kóbi júzege asyrylyp keledi. Bıznes pen bılik arasyndaǵy ornatylǵan baılanys osy baǵytta damıdy dep oılaımyz», – dep aıaqtady Tólemis Shotanov.
