Mal baǵatyndar úshin maldyń etin ótkizý qıynnyń qıyny. Al, qaladaǵylar bolsa aq-adal jolmen baýyzdalǵan, kúıli de saý maldyń etin alǵysy keletini belgili. Aqtaýda osy eki qajettilikti óteı alatyn jańa qyzmet túri paıda boldy. Ol «Qazaqy et ortalyǵy» dep atalatyn oryn. Mal arnaıy halal jolymen soıylyp, ǵusyl dáretpen, basyna oramal taqqan qyz-kelinshekter pisirgen etke suranys ta kóp eken. Kireberiste qolǵa sý quıylyp, súlgi usynylyp, tabaqty kelinder sálem salyp alýynyń ózi qazaqy ortaǵa qyzyǵýshylyqty arttyra túsedi. Tipti, qazy-qarta, jal-jaıasymen, qoldan daıyndalǵan nan salǵan etti astyryp, úı-úıge tapsyryspen aldyratyndar qatary kóbeıgen. Bıznesin damytyp, ári ulttyq asty nasıhattaýdy qolǵa alǵan kásipkerler suranystyń kóp ekendigin, qazaqtyń et asý ónerin jáne árbir qazaq súıip jeıtin etti ulttyq brendke aınaldyrýdy maqsat etip otyr. Ortalyqqa kelgen qonaqtar, ásirese, sheteldikter qazaqtyń et taǵamyn jeýmen birge, ultymyzdyń salt-dástúrimen, án-kúı, jyr-terme tyńdap, qazaqtyń mádenıetimen tanysa túsetin bolady.
Ortalyqtan súrlengen et, jańa soıylǵan maldyń eti, qoı, sıyr, jylqy, túıe eti, qýyrdaq jáne onyń túrleri, qazy-qarta, jal-jaıa, bujy, shujyq – barlyǵyn tabýǵa bolady. Turǵyndardyń birqatary qazaqtyń ulttyq taǵamyn nasıhattaýda utymdy jol dese, endi bireýleri etti úıge asyp ákelip berse, kelinderdiń «qoly uzaryp, jasaıtyn jumys tappaı qala ma?» dep alańdaýly.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
