Semınar tilderdi qysqa merzimde oqytýdyń qazirgi tehnologııasyn daıyndaý men engizý arqyly Qazaqstan halqy birliginiń mańyzdy faktory retindegi memlekettik tildiń rólin arttyrýdy, qazaqstandyq biregeılikti qalyptastyrýdy maqsat etip qoıdy. Igi maqsattaǵy basqosýǵa Qazaqstan Prezıdenti janyndaǵy «Qoǵamdyq kelisim» RMM ókili Kamal Álpeıisova, «Ult taǵdyry» respýblıkalyq qoǵamdyq qozǵalysynyń tóraǵasy Dos Kóshim, «Jaǵdaıattyq qazaq tili» oqýlyǵynyń avtory Qanat Tasybekov, «Iаzyk ı kýltýra – kazahskıı dlıa vseh» qazaq tilin úıretý oqýlyǵynyń avtory Raýshan Kóshenova kelip qatysty.
«Mundaı semınar-trenıng aldyńǵy jyly Almaty oblysynda, ótken jyly Batys Qazaqstan oblysynda, bıyl Qostanaıda ótip otyr. Semınardyń Qostanaıda ótýiniń mańyzy bar. Oblystyń, onyń ishinde qala halqynyń basym bóligi orys tilinde sóılegendikten, memlekettik tilge basym nazar aýdartý kerek. Al tildi meńgerý úshin qazir ınnovasııalyq tásilder qajet bolady. Til úıretýde ozyq ádistemesi bar ǵalymdar semınarda tájirıbelerimen bólisti. Qazaq dalasyndaǵy alǵashqy mektep ashylǵan aımaqta memlekettik tildiń saltanat qurýy osy oblystaǵy basymdyq sharýanyń biri bolýy kerek dep oılaımyn. Bizdiń maqsat – jaqsy bastamaǵa kómek berý», dedi Qazaqstan Prezıdenti janyndaǵy «Qoǵamdyq kelisim» RMM ókili Kamal Álpeıisova.
Semınarda orys mektepterindegi qazaq tili pániniń muǵalimderi, Dostyq úıi janyndaǵy etno aǵartý keshenderiniń ádiskerleri men oqytýshylary, til salasynyń mamandary semınar qonaqtarynyń leksııasynan kóp maǵlumat aldy.
«Mundaı semınar izdenisterge bastaıdy. Onyń syrtynda memlekettik tildi úırengisi keletinder eńbek etýi kerek. О́ıtkeni sózdik qordy molaıtý tek eńbekpen keledi. Semınar memlekettik tilge degen jastardyń qyzyǵýshylyǵyn oıatady dep oılaımyn», dedi Fedorov aýdany ortalyǵyndaǵy №1 orta mekteptiń qazaq tili muǵalimi Dmıtrıı Romashenko.
Názıra Járimbetova,
«Egemen Qazaqstan»
