"Bolashaq" túlekteriniń 98 paıyzy jumyspen qamtylǵan

"Bolashaq" baǵdarlamasy túlekteriniń 98 paıyzy jumyspen qamtylǵan, olardyń ishinde: 56 paıyzy memlekettik uıymdar men mekemelerge, 29 paıyzy - jeke sektorǵa, 12 paıyzy - halyqaralyq uıymdarǵa jáne tek 1 paıyzy ǵana – ulttyq kompanııaǵa ornalasqan. Jumysqa ornalastyrylmaǵan 2 paıyzy oqýyn aıaqtap, sheteldik dıplomynyń túpnusqasyn kútip otyrǵan túlekter. Bul týraly búgin Ortalyq kommýnıkasııalar qyzmetinde ótken baspasóz konferensııasynda «Halyqaralyq baǵdarlamalar ortalyǵy» AQ prezıdenti Janbolat Meldeshov aıtty. –23 jyl buryn Ult kóshbasshysynyń bastamasymen «Bolashaq» halyqaralyq stıpendııasy bilim salasyndaǵy eń alǵashqy jobalardyń biri bola otyryp, ulttyń básekege qabilettiligin arttyrý jáne nyǵaıtý isiniń qoldanystaǵy tetigine aınaldy. Elimizdiń halyqaralyq bet-beınesiniń qalyptasýyna olardyń da qosqan úlesteri zor. 2016 jylǵy 5 qarashada 23 jyl tolǵan «Bolashaq» baǵdarlamasy – bul táýelsiz Qazaqstannyń mańyzdy ınnovasııalyq jobalarynyń biri, - dedi Janbolat Meldeshov. 23 jylda «Bolashaq» stıpendııasy sheńberinde ulttyq ekonomıkanyń túrli salalary úshin 9 339 maman daıarlandy, olardyń arasynda 2 000-nan asa ınjener, 2 000-ǵa jýyq mektep jáne joǵary oqý oryndarynyń ókilderi, el óńirlerine arnalǵan 600 dáriger, 400 memlekettik qyzmetshi, 200 shyǵarmashylyq salasynyń qyzmetkeri jáne 2 000-nan asa ulttyq jáne jeke kompanııa mamandary bar. 2016 jyly shetelde joǵary bilikti kadrlar daıarlaý baǵdarlamasy sheńberinde Respýblıkalyq komıssııanyń sheshimimen 231 stıpendııa taǵaıyndaldy «Memleket basshysy qazaqstandyq ulttyń joǵary biliktiligi memlekettiń básekege qabilettiliginiń negizgi faktory ekendigin birneshe ret atap ótken bolatyn. «Bolashaq» baǵdarlamasy jıyrma jyldan asa ýaqyttan beri zamanaýı joǵary jáne joǵary oqý ornynan keıingi bilim flagmany bola otyryp, joǵary bilimdi ulttyń qalyptasýyna óziniń aıtarlyqtaı úlesin qosyp keledi», - dedi «Halyqaralyq baǵdarlamalar ortalyǵy» AQ prezıdenti. Sonymen qatar konferensııa barysynda "100 naqty qadam" Ult jospary barysynda 70-qadamǵa sáıkes AQSh pen Ulybrıtanııaǵa taǵylymdamaǵa «Astana» halyqaralyq qarjy ortalyǵynyń bir top qyzmetkerleri jiberilip, jaqyn ýaqytta 24-qadamǵa sáıkes Ulybrıtanııaǵa AIFC halyqaralyq tórelik ortalyǵyn qurýǵa tartylǵan sot qyzmetkerleri men sýdıalar da baratyny belgili boldy.