Duty Free tól taýarlarymyzdy tanymal etedi

Taıaýda «Halyq markasy» qazaqstandyq taýarlar men qyzmetterdiń sapasyn baqylaý júıesi federasııasy» ZTB Aqtaý qalasyndaǵy Duty Free jelisimen arada kelisimge qol jetkizgeni belgili. Endi áýejaılardaǵy osy dúkender jelisinde «Halyq markasynyń» taýarlaryna arnalǵan sóreler paıda bolmaq. Osy oraıda, jalpy, Duty Free dúkender jelisiniń tutynýshylar úshin de, kásipkerler úshin de tıimdi tustaryn aıta ketpekpiz. Birinshiden, keıbir tanymal brendter tek qana Duty Free dúkenderinde satylady. Máselen, «trevel set» atalyp júrgen, jolaýshylar úshin óte yńǵaıly, shaǵyn kólemde shyǵarylatyn kosmetıkalardy aıta ketýge bolady. Kishkentaı flakondardaǵy ıissý, boıaýlardy basqa dúkenderden tappaýyńyz múmkin. Ekinshiden, bul dúkenderden alǵan taýarlardyń qoldan jasalmaǵany, sol brendtiń ónimi ekeni eshqashan kúmán týdyrmaıdy. Sýsyn, kosmetıka, ishimdik, shokolad syndy saıahatshylar úshin suranysqa ıe taýarlardyń sapasy úshin qam jemeýge bolady. Úshinshiden, Duty Free jelisinde eń kóp suranysqa ıe taýarlardyń biri alkogoldi ishimdikter ekeni jasyryn emes. Basqa dúkenderge qaraǵanda, bul jerdegi sýsyndardyń baǵasy eki esege jýyq arzan. Duty Free jelisine kásipkerlerdiń qumartatyn tustary az emes. Eń bastysy, onda keıbir aksızsiz, baj salyǵynsyz taýarlar satylady. Taýar el aýmaǵynan shyǵarylatyn bolǵandyqtan, qosymsha qun salyǵynan da bosatylǵan. Sol úshin keıbir álemdik deńgeıdegi taýar óndirýshiler keıbir ónim túrlerin arnaıy Duty Free úshin shyǵaratyny da málim. «Halyq markasy» birlestiginiń negizin qalap, otandyq óndiristi damytýǵa, tól ónimderimizdi tanytýǵa úles qosyp júrgen jandardyń biri Rımma Tájibaevanyń aıtýynsha, Duty Free dúkender jelisi arqyly satylymǵa shyǵarý otandyq ónimderdiń tanymaldyǵyna yqpal etetini anyq. Qazaqstanda jasalǵan kondıterlik ónimder, sýsyndar, kádesyılar jáne basqa da taýarlar endi osy dúkenderde satyla bastaıdy. "Biz ózimizde bar múmkindikterdiń bárin paıdalanyp, otandyq brendterdi tanymal etýge tyrysamyz. Duty Free Aqtaý jelisimen kelisimge kelýimiz osy baǵyttaǵy qadamdarymyzdyń biri. Buǵan deıin otandyq taýarlar joǵaryda aıtylǵan saýda núktelerinde bolmaǵan edi", - deıdi. Onyń aıtýynsha, «Halyq markasynyń» ónimderi otandyq áýejaılardyń aýmaǵynda ǵana emes, shet memleketterdiń aýmaǵynda da satylýǵa tıisti. Sol úshin aldaǵy ýaqytta qazaqstandyq ónimder Duty Free saýda jelisiniń Eýropa elderindegi, Ázerbaıjan, Qyrǵyzstan, Reseı, Túrkııa elderindegi núktelerinde tól ónimderimizdiń sóreleri paıda bolýǵa tıis. Demek, Aqtaý áýejaıynda boı kótergen otandyq ónimder sóresi jıyrma elde ashylatyn dúken sóreleriniń alǵashqysy desek qatelespeımiz. Arnur Asqar, "Egemen Qazaqstan".