Qyzylordada oblystyq kórme-konkýrs ótti

Búgin Qyzylordada «2016 jyly Qyzylorda oblysynda shaǵyn jáne orta kásipkerlikti damytý salasyndaǵy jetistigi úshin» oblystyq kórme-konkýrsy ótti. Qyzylorda oblysynyń ákimi Qyrymbek Kósherbaev jeńimpazdardy quttyqtap, aımaq ekonomıkasy úshin shaǵyn jáne orta kásipkerliktiń mańyzdylyǵyn atap ótti. - Qazirgi tańda oblysymyzda óńirimizdiń áleýmettik-ekonomıkalyq jaǵdaıyna zor úlesin qosyp otyrǵan 5 myńǵa jýyq shaǵyn jáne orta bıznes kásiporyndary jáne 35 myńnan astam jeke kásipkerler men sharýa qojalyqtary jumys jasaıdy. Atalǵan sektorda 100 myńǵa jýyq adam jumyspen qamtylǵan – bul oblystaǵy ekonomıkalyq belsendi halyqtyń úshten bir bóligi. Qazir de qurylyp jatqan jańa jumys oryndarynyń negizgi bóligi osy shaǵyn jáne orta kásipkerlikpen qamtamasyz etilip jatqandyǵy, kásipkerlikke qolaıly ortany qalyptastyrmaı ekonomıkany damytý múmkin emestigi, orta synyp – qoǵamdaǵy turaqtylyqtyń negizi ekendiginde eshkimniń de talasy joq dep oılaımyn,- dedi oblys ákimi Qyrymbek Kósherbaev. Oblystyq kórme-konkýrs aıasynda shaǵyn jáne orta kásipkerlik ónimderi men taýarlarynyń kórmesi uıymdastyryldy. Konkýrsqa barlyǵy 40 kásiporyn qatysty. «О́ndiris salasyndaǵy jetistikteri úshin» nomınasııasy boıynsha úshinshi oryndy qazalylyq jeke kásipker Manas Bıgerestanov, ekinshi oryndy «MIR-2001» JShS alsa, birinshi orynǵa «KNK Kemıkal» JShS ıe boldy. «Azyq-túlik ónerkásibi salasyndaǵy jetistigi úshin» nomınasııasy boıynsha úshinshi oryndy shıelilik jeke kásipker Sabyr Ermahanov ıelense, ekinshi oryndy «Qarashalań» servıstik daıyndaý ortalyǵy» aldy. Al birinshi orynǵa «Qylysh» sharýa qojalyǵy ıe boldy. «Jeńil ónerkásiptegi jetistikteri úshin» nomınasııasy boıynsha úshinshi oryndy Syrdarııa aýdanynyń jeke kásipkeri Jánibek Mahanbet, ekinshi oryndy jeke kásipker «MSK», al birinshi oryndy «DALATEX» JShS aldy. Jeńimpazdar dıplomdar men baǵaly syılyqtarmen marapattaldy. Budan bólek, kásipkerler oblys ákiminiń alǵys hatymen marapattaldy. 1991 jyly dúnıege kelgen Táýelsizdiktiń tól qurdastaryna jeke nagradalar tabystaldy.