Aýyl sharýashylyǵyn damytý ǵylymǵa baılanysty

Ortalyq kommýnıkasııalar qyzmetinde aýyl sharýashylyǵyn damytý máselesine arnalǵan baspasóz máslıhaty ótti. Oǵan Aýyl sharýashylyǵy mınıstrligi «Ulttyq agrarlyq ǵylymı-bilim berý ortalyǵy» kommersııalyq emes aksıonerlik qoǵamynyń basqarma tóraǵasy Asqar Nametov pen «Aýyl» partııasynyń tóraǵasy Ǵanı Qalıev qatysty. «Qazaqstannyń agrarlyq ǵylymynyń strategııalyq maqsaty – básekege qabiletti ónimdi alý. Osy máseleni sheshý maqsatynda 2015 jyldyń tamyz aıynda Úkimettiń Qaýlysy boıynsha Aýyl sharýashylyǵy mınıstrligi «Ulttyq agrarlyq ǵylymı-bilim berý ortalyǵy» KEAQ quryldy. Ortalyqty qurýdyń negizgi maqsaty – joǵary bilikti mamandardy daıyndaý jáne qaıta daıyndaý, ǵylymı zertteýler nátıjelerin óndiriske engizý. AО́K tıimdi sheteldik tehnologııalardy transfertteý negizinde Qazaqstan ekonomıkasy agrarlyq sektorynyń ınnovasııalyq damýyna qoldaý kórsetý», – dedi ol. Onyń aıtýynsha, qazirgi tańda UAǴBO KEAQ bilimdi, ǵylymı-tehnıkalyq qyzmet nátıjeleri men ǵylymı-zertteý uıymdarynyń qyzmetterin taratýdyń tıimdi joldaryn qarastyrýda. Sonymen qatar, «UAǴBO» KEAQ quramynda agrarlyq tehnologııalardy transfertteý jáne kommersıalızasııalaý ortalyǵy (ATTK) jumys isteıdi. Ortalyqtyń negizgi qyzmeti otandyq ǵylymı-zertteý mekemeleriniń ǵylymı-tehnıkalyq nátıjelerin engizýge baǵyttalǵan. Búginde elimizde sheteldik ınnovasııalardy engizý úshin ATTK qyzmetin keńeıtý máselesi qarastyrylýda. Osy máselelerdi sheshý arqyly ǵylymı uıymdardyń qyzmetin aýyl sharýashylyq taýar óndirýshilerdiń qajettilikterine sáıkes óndiriske jańa tehnologııalardy engizýge baǵyttalǵan zertteýdi damytýǵa jol ashady. Aıta ketý kerek, Aýyl sharýashylyǵy mınıstrligi ǵylym jáne óndiris arasyndaǵy baılanysty qamtamasyz etý boıynsha jumystar júrgizip jatyr. Bul fermerler úshin tıimdi ınnovasııalyq tehnologııalardy engizýmen aınalysatyn aýyl sharýashylyq taýar óndirýshilerdiń sanyn 10 paıyzdan 25 paıyzǵa deıin arttyrýǵa múmkindik beredi. Búgingi tańda Ulttyq agrarlyq ǵylymı-bilim berý ortalyǵynyń quramynda 3 agrarlyq JOO, 31 fılıaldary bar 23 ǵylymı zertteý ınstıtýttary, 7 tájirıbelik sharýashylyqtar, 7 seleksııalyq stansııalar, 4 servıstik kompanııalar bar. 2016 jyldyń 1 qarashasyna ǵylymı zertteýlermen aınalysatyn qyzmetkerler sany 5513 adamdy qurady, olardyń ishinde 1443 ǵylymı qyzmetkerler: 142 ǵylym doktory, 389 ǵylym kandıdaty, 4 PhD doktory jáne 246 magıstr. Dastan KENJALIN, «Egemen Qazaqstan»