Bas prokýror Jaqyp Asanovtyń tóraǵalyq etýimen Zańdylyqty, quqyqtyq tártipti jáne qylmysqa qarsy kúresti qamtamasyz etý jónindegi úılestirý keńesiniń kezekti otyrysy ótti.
Sharada quqyq qorǵaý organdary jeke quramynyń sybaılas jemqorlyqqa qarsy zańnamany jáne memlekettik qyzmetshilerdiń Ádep kodeksin saqtaýy máseleleri jan-jaqty talqyǵa tústi. Otyrysty ashqan Bas prokýror J.Asanov Elbasynyń kásibı apparatty qalyptastyrý boıynsha reformasynyń mańyzdylyǵyna toqtalyp, bul baǵytta quqyq qorǵaý organdarymen orasan zor jumystar júzege asyrylýda ekendigin atady. Bas prokýror jeke quram arasynda kadrlardy irikteý júıesiniń ashyqtyǵy, obektıvtiligi qamtamasyz etilýde, basshylyq quramdy taǵaıyndaýdyń tásildemesi ózgerip, qyzmetkerlerdi daıarlaýdyń tetikteri jetildirilýde ekendigin aıtty.
Budan keıin sóz alǵan agenttik tóraǵasy Qaırat Qojamjarov jemqorlyqqa qarsy kúres máselesi ózekti ekendigin basa aıtty. Sondaı-aq, ol zańdylyq pen ádildik, kásibı deńgeı men ádeptilik qasıetteriniń arqasynda ǵana halyqtyń tártip saqshylaryna senimi artyp otyrǵandyǵyn alǵa tartty. Jalpy, quqyq qorǵaý júıesindegi júrgizilip jatqan reformalardan qoǵam úlken ózgerister kútýde. Bul baǵyttaǵy negizgi basymdyqtar «100 naqty qadam» Ult josparynda aıqyndalǵan. «Bir jaǵynan quqyq qorǵaýshylar qataryna joǵary deńgeıli kásibı mamandardyń kelýin qamtamasyz etý qajet. Olar konstıtýsııalyq qurylys pen qoǵamdyq tártipti, qaýipsizdikti saqtaýdy qamtamasyz etýge mindetti jáne jemqorlyqtan taza bolyp, azamattardyń senimin týdyrýlary tıis», – dedi Qaırat Perneshuly.
Agenttik tóraǵasy qazirgi kezde osyny tolyǵymen júzege asyrýǵa álemdik tájirıbede beıindelgen quraldar jetkilikti ekendigin aıtty. Atap kórsetkende, polıgraf, kásibı jáne jeke bas biliktiligin anyqtaýǵa arnalǵan testter, sybaılas jemqorlyqqa qarsy shekteýler men mindettemeler, ishki qaýipsizdik bólimsheleriniń jumysy. Budan basqa, agenttik basshysy jas qyzmetker jeke basyn baıytý úshin laýazymdyq ókilettigin qoldaný týraly oımen qyzmetke túspeýi kerektigine ekpin berdi. Q.Qojamjarovtyń paıymynsha, árbir qyzmetker quqyq qorǵaý júıesindegi qyzmetin adal jáne eńbegine laıyq laýazymdyq satymen jyljı alatyndaı etip qurýy kerek.
Asqar TURAPBAIULY,
«Egemen Qazaqstan»
Bas prokýror halyqaralyq Transperensı Interneshnl uıymynyń málimetterine súıene otyryp, 1,5 myń adammen saýaldama júrgizilgendigimen bólisti. Keltirilgen málimetke qaraǵanda, saýaldama júrgizilgenderdiń 37 paıyzy sybaılas jemqorlyqpen kúreste alǵa jyljýshylyq bar ekendigin málimdep, tıisti organdar belsendi áreketke kóshe bastaǵandyǵyn atap kórsetipti.
Talqylaý barysynda birqatar jaıttar ortaǵa salyndy. Otyrys qorytyndysy boıynsha tártipti nyǵaıtý, jeke quram arasynda sybaılas jemqorlyqty azaıtý jáne quqyq qorǵaý organdaryna halyqtyń senimin arttyrý maqsatyndaǵy jol kartasy qabyldandy.