Búginde alǵa qoıylǵan ıgi maqsat, múddelerdiń bári birtindep júzege asý ústinde. Eń bastysy, táýelsiz sarapshylar pikirine súıensek, qazirgi kúni sybaılas jemqorlyqqa tózbeıtin, para bermeıtin, para almaıtyn jastar qatary kóbeıip keledi eken. Mundaı jetistik ońaılyqpen kele qoımaǵany jáne belgili. Keńestik kezeńniń qursaýynan bosaǵan elder esterin jııa almaı ári sybaılastyqpen kúreserge dármen taba almaı jatqanda Elbasy N.Nazarbaev TMD memleketteri arasynda birinshi bolyp, sonaý 1998 jyly-aq, «Sybaılas jemqorlyqqa qarsy kúres týraly» zańǵa qol qoıdy. Árıne, keıin bul zańǵa birtindep ózgerister men tolyqtyrýlar engizildi. Al búginde álem elderiniń de aldynda turǵan ózekti máseleniń biri memlekettik qyzmet salasyndaǵy sybaılas jemqorlyq eken. Orasan zor saldary bar bul áleýmettik dertten bizdiń Qazaqstan qoǵamy da túgeldeı arylyp boldy dep aıta almaımyz. Sondyqtan sybaılas jemqorlyq máselesi memleket pen qoǵamnyń búkil salasyna qatysty ótkir sıpat alyp, burynǵydan beter ózektene túsýimen nazar aýdartady. Sebebi, jemqorlyq derti memlekettik qyzmettegi para alatyn laýazymdy tulǵalardyń bedelin túsirip qana qoımaı, bılik júıesiniń, sonymen qosa búkil áleýmettik júıeniń quldyraýyna ákelip soǵýymen qaýipti. Memleket basshysy halyqqa arnaǵan joldaýlarynda da sybaılas jemqorlyq problemasyna erekshe nazar aýdaryp keledi. Máselen, «Qazaqstan joly-2050: bir maqsat, bir múdde, bir bolashaq» atty Joldaýynda Qazaqstannyń aldaǵy onjyldyqtardaǵy basty maqsaty álemniń 30 damyǵan eliniń qataryna qosylý ekenin mindet etip qoıdy. Árıne, mundaıda sybaılas jemqorlyq elimizdiń órkendeýine qaýip tóndirip, kedergi keltiretindigi daýsyz. Sondyqtan da, Elbasynyń mindetterine sáıkes, elimiz sybaılas jemqorlyqqa jáne kóleńkeli ekonomıkaǵa qarsy turýdy, sondaı-aq, shaǵyn jáne orta bıznesti qorǵaýdy qolǵa aldy. Sóıtip, sybaılas jemqorlyqtyń uıymdasqan nysandarynyń jolyn kesýge baǵyttalǵan júıeli jumys tásilderi jasaldy. Soǵan oraı qazirgi tańda memlekettik organdar arqyly 2015-2025 jyldarǵa arnalǵan Sybaılas jemqorlyqqa qarsy kúres strategııasy iske asyrylýda. Bul baǵdarlamanyń sheńberinde ulttyq zańnamany jetildirýge, memlekettik organdardaǵy sybaılas jemqorlyq táýekelderin azaıtýǵa, kóleńkeli ekonomıkanyń deńgeıin tómendetýge baǵyttalǵan túrli quqyqtyq sharalar kózdeldi. Elbasynyń Sybaılas jemqorlyqqa qarsy strategııasynyń jańa tásilderin jasaý týraly tapsyrmalaryn oryndaý maqsatynda Qazaqstan Respýblıkasynyń sybaılas jemqorlyqqa qarsy saıasatyn jetildirý jónindegi is-sharalar josparynyń jobasyna únemi jańa usynystar engizilip keledi. Joǵaryda aıtqanymyzdaı, TMD elderiniń arasynda alǵash ret Qazaqstanda «Sybaılas jemqorlyqqa qarsy kúres týraly» Zań qabyldanǵaly beri onyń áleýeti de, máni men mańyzy da kúnen-kúnge artyp keledi. Atalǵan zań azamattardyń quqyqtary men bostandyqtaryn qorǵaýǵa, sybaılas jemqorlyq kórinisterinen týyndaıtyn qaýip-qaterden Qazaqstan Respýblıkasynyń ulttyq qaýipsizdigin qorǵaýǵa, sybaılas jemqorlyqqa baılanysty quqyq buzýshylyqtyń aldyn alý men anyqtaýǵa jáne jolyn kesý, ashý, zardaptaryn joıý men kinálilerdi jaýapqa tartý arqyly memlekettik organdardyń, memlekettik mindetterdi atqaratyn laýazymdy jáne basqa da adamdardyń, sondaı-aq, olarǵa teńestirilgen adamdardyń tıimdi qyzmetin qamtamasyz etýge arnaldy. Osylaısha barlyq adamdardyń zań men sot aldyndaǵy teńdigi qamtamasyz etildi. Taǵy bir qýantatyn jaǵdaı, ótken jyly Elbasy qol qoıǵan «Qazaqstan Respýblıkasyndaǵy memlekettik qyzmet jónindegi keıbir zań aktilerine ózgerister men tolyqtyrýlar engizý týraly» Zań onyń iske asýy bolyp otyr. Osy zańnyń jańa talaptaryna sáıkes, endi quqyq qorǵaý organdaryna qyzmetke baratyn azamattar zańdardy bilý men jeke adamgershilik qasıetteri boıynsha Memlekettik qyzmet jáne sybaılas jemqorlyqqa qarsy kúres agenttiginde baǵalaýdan ótedi. Bul óz kezeginde memlekettik qyzmetke kimniń laıyq nemese laıyqsyz ekenin aldyn ala bilýge múmkindik beredi. Endeshe, keleshekte memlekettik qyzmetke eli men halqyna adal qyzmet etýge daıyn, sybaılastyqqa jany qas azamattar iriktelip keledi dep úmitteneıik...
Aleksandr TASBOLATOV,
«Egemen Qazaqstan»
