Elbasynyń jańa Joldaýynyń erekshe sıpaty – memleketimizdiń qazirgi zamandaǵy damýynyń túbegeıli tustaryn zerdelep, onyń san qyrly salalaryn júıeli túrde jańǵyrtý máselesine mán berýinde. Táýelsizdiginiń shırek ǵasyryn atap ótken el úshin bolashaqqa senimdi qadam jasaý ózekti ekeni belgili. Strategııalyq mazmuny bar qujatta anyqtalǵan bes basymdyqtyń árqaısysy elimizdiń búgini men erteńi úshin asa mańyzdy. Ekonomıkanyń jańa draıverlerine úlken úmit arta otyryp, Elbasy osy basymdyqtarda tranzıtti qoǵamnyń zamanaýı kezeńine sáıkes keletin ózindik erekshelikterine toqtalady. Demek, qazirgi zamannyń naǵyz damyǵan órkenıetti elderiniń qataryna qosylý úshin eski ekonomıkalyq júıeni ǵana emes, sonymen qatar, qoǵamdyq sanany da ózgertýge tıispiz degen oıdy ortaǵa salady. Shyn máninde, Japonııa, Koreıa, Sıngapýr, Taıvan, Malaızııa sııaqty Ońtústik-Shyǵys Azııanyń birneshe eli batyl qadamdardyń arqasynda ózderiniń áleýmettik ınfraqurylymyn, ekonomıkasyn HH ǵasyrdyń aıaǵynda túbegeıli ózgertip, úlken órkenıettik sekirister jasady. Sondyqtan, olardy «Azııa jolbarystary» dep ataıdy. Árıne, joǵaryda atalǵan elderdiń barlyǵy árqıly damý satylarynan ótti, sonymen qatar, árbir eldiń ózindik qıyndyqtary, daralanǵan soqpaqtary da boldy. Olardyń júrgen joldaryna, áleýmettik tájirıbesine nazar aýdarǵanmen, bizder tikeleı kóshirme jasaı salmaıtynymyz anyq. Qazaqstan jas memleket bolǵanymen, ózindik erekshe joly bar, áleýmettik progress týraly ózindik túsinikteri bar el. Máselen, qoǵamymyzda sońǵy jyldary belsendi túrde jasalyp jatqan kóptegen memlekettik reformalar álemde balamasy joq dúnıeler bolyp tabylady. Olardy daǵdarystardan ótý boıynsha buryn-sońdy tarıhta kórinis bermegen qadamdar dese de bolady. Máselen, «Nurly jol» baǵdarlamasy men «100 naqty qadam» Ult jospary sııaqty qujattardyń áleýmetke kenetten kelgen daǵdarysty kezeńnen abyroımen shyǵý úshin úlken demeý bolǵany, baǵdar bolǵany anyq. Nursultan Nazarbaev shynaıy Kóshbasshy retinde óziniń sóılegen sózderinde tehnologııalyq jańǵyrýlarmen qatar, azamattarymyzdyń dúnıetanymyndaǵy sapaly ózgeristerdiń bolǵanyn, tehnologııalyq jańǵyrtýlar zamanynda ınnovasııalyq oılaýdyń, mádenıettiń damý barysynda jetekshi ról atqarýǵa tıisti ekenin aıtyp keledi. Qazirgi zamannyń san astarly talaby, syn-qaterleri Qazaqstan jurtshylyǵyn da aınalyp ótpeıdi. Biz de álemdik damýdyń, jahandaný úderisteriniń aýqymyndamyz, sondyqtan árdaıym ózimizdiń ulttyq kelbetimizdi, rýhanı mádenıetimizdi joǵaltpaı, kemeldene berýimiz kerek. Osyǵan oraı qazaq, orys jáne aǵylshyn tilderin jas urpaqtyń meńgere túsýine asa mán berilgen. Elimizdiń pedagogtar korpýsyna osy salada úlken zııatkerlik júk artylyp otyr. Joldaýda ınnovasııalyq úderisterdiń áleýmettik dúnıeniń barlyq salasyn qamtıtyny aıtyldy. Medısına men bilim berý salasy, saýda men kásipkerlik júıesi, sonymen qatar, memlekettik qyzmettiń barlyq salalary «Sıfrlyq Qazaqstan» baǵdarlamasyna arqa súıep, tıimdi qyzmet kórsetýi tıis ekeni atap kórsetildi. Álemniń ozyq elderinde shyǵarmashylyq erkindiktiń nátıjesinde damyǵan salalar qazirgi zamanda olarǵa kóptegen qarjylyq tabystar ákelýde. Sondyqtan, memlekettik tekserýshi organdardyń birshamasyna osy faktordy eskergen jón. Qoǵamymyzdyń keleshegi úshin barynsha shynaıy qyzmet etip jatqan kásibı mamandardyń is-áreketterine barynsha múmkindikter jasalǵany abzal. Elimizde 21-ret jarııalanyp otyrǵan Prezıdentimizdiń Joldaýy ekonomıkadaǵy tehnologııalyq pármendi damýmen qatar, áleýmettik dúnıedegi qaıshylyqty máselelerdiń sheshimin izdeýge shaqyrady. Máselen, dinı ekstremızm men radıkalızm máseleleri qoǵamymyzdyń ishki rýhanı turaqtylyǵyna, memleketimizdiń qaýipsizdigine birshama nuqsan keltirdi. Osy mańyzdy máselelerdiń tıimdi sheshimderin tabýda Elbasy tarapynan biryńǵaı memlekettik organdardyń kúshimen jazalaý tásilin qoldaný usynylmaıdy, kerisinshe, qoǵamdaǵy qaıshylyqtyń aldyn alý qadamdaryn jetildirip otyrý aıtylady. Osyǵan oraı, qoǵamymyzda, barlyq aımaqtarda, ásirese, jastar arasynda rýhanı-adamgershilik tárbıesin júrgizý ózektene túsedi. Qoǵamymyzdyń rýhanııatyn jetildire túsý úshin, adamaralyq qatynastardaǵy úılesimdilikti nyǵaıta túsý úshin elimizdiń jastardy tárbıeleýshi mekemelerine ǵalymdardyń, tutastaı alǵanda, zııaly qaýymnyń da myqty qoldaýy aýadaı qajet.
Zarema ShÁÝKENOVA,
Fılosofııa, saıasattaný jáne dintaný ınstıtýtynyń dırektory, UǴA korrespondent-múshesi
