Búgin Syrtqy ister mınıstrliginde Táýelsizdiktiń 25 jyldyǵy mereıtoıy qarsańynda «Táýelsizdik Týy astynda» tarıhı-derekti kórme ashyldy. Onyń ótýine atalǵan vedomstvo men Qazaqstan Respýblıkasy Prezıdentiniń Muraǵaty uıytqy boldy.
Is-sharanyń ashylýynan keıin BAQ ókilderine arnalǵan brıfıngte sóz alǵan Syrtqy ister mınıstriniń orynbasary Roman Vasılenko shırek ǵasyr ishinde Qazaqstannyń memleket retindegi qalyptasý kezeńderin, qol jetkizgen jetistikterin aıqyndaıtyn qundy qujattar men fotosýretter qoıylǵan kórmeniń mańyzy aıryqsha ekenin atap ótti. Sondaı-aq, ol: «Bul rette, men eń aldymen, Qazaqstan Respýblıkasy Prezıdenti Muraǵatynyń dırektory Borıs Japarovqa, Muraǵat qyzmetkerlerine osyndaı ıgi sharany ótkizý úshin úlken nıettestik tanytqany, jurt nazaryna usynylǵan qujattar tóńireginde úlken zertteý jumystaryn júrgizgeni úshin rızashylyǵymdy bildirgim keledi», – dedi.
Borıs Japarov Táýelsizdik jyldary memleket aldynda úlken mindetter qoıylǵanyn, ol mindetterdi sheshý, ekonomıkany turaqtandyrý, alǵa qaraı damytý naqty demokratııa men naryqtyq qatynastarǵa negizdelýimen erekshelengenin jetkizdi.
«Qazaqstan óz Táýelsizdigin jarııalaǵan kúnnen bastap, halyqaralyq uıymdarǵa óz erkimen múshe bolý múmkindigin aldy. 1992 jyldyń 30 qańtarynda Eýropadaǵy Qaýipsizdik jáne yntymaqtastyq uıymyna múshelikke ótti. Al 1992 jyldyń 2 naýryzynda elimiz BUU-nyń tolyq múshesi boldy. 1993 jyldyń qazan aıynda Qazaqstan Ekonomıkalyq yntymaqtastyq uıymyna múshelikke kirse, 1994 jyldyń 24 mamyrynda arnaıy qujatqa qol qoıa otyryp, elimiz NATO-nyń «Beıbitshilik jónindegi áriptestigi» uıymynyń 19-shy múshesi boldy. Jalpy, XX-shy ǵasyrdyń sońyndaǵy tarıhı kezeńde Qazaqstan adamzattyń, jalpy dúnıeniń qasiretine aınalǵan Semeı ıadrolyq synaq alańdaryn jabý, Keńes Odaǵynyń enshisinen ótken ıadrolyq qarýlar men onyń jetkizý quraldarynan óz erkimen bas tartý arqyly álemge beıbitsúıgish memleket retinde tanyldy», – dedi Borıs Japarov.
Sonymen qatar, ol elimizdiń derbes memleket retinde qalyptasýy men halyqaralyq qaýymdastyqta jetken jetisteriniń tarıhy Qazaqstan Respýblıkasy Prezıdenti Muraǵatynyń qorlarynda saqtalǵan qujattarda tolyqtaı kórsetilgenin aıtty.
«Onda resmı-hronıkalyq qujattarmen qatar, saıası jáne qoǵamdyq uıymdardyń materıaldary, Táýelsizdik kezeńiniń merzimdi basylymdary da bar. Sizderdiń nazarlaryńyzǵa «Táýelsizdik Týy astynda» degen taqyryppen usynylyp otyrǵan kórmede Táýelsizdik alǵan jyldardan bastaý alatyn memlekettiliktiń qalyptasý tarıhyn tolyq ashyp kórsetetin qujattar ornalastyryldy», – dedi ol óz sózinde.
Kórme 5 bólikten turady. Olarda Qazaqstannyń Memlekettik nyshandary, Qazaqstannyń Tuńǵysh Prezıdenti, el Parlamenti, Úkimeti, Ulttyq valıýtanyń aınalymǵa enýi, Qazaqstan halqy Assambleıasynyń, syrtqy saıası vedomstvonyń qurylýy, dıplomatııalyq baılanystardyń ornaýy, Qazaqstannyń BUU-ǵa qabyldanýy, sondaı-aq, elimizdiń shet memlekettermen saıası-ekonomıkalyq baılanys ornatýy týraly qundy materıaldar, Qazaqstan Prezıdentiniń túrli sheteldik áriptesterimen suhbattary jáne halyqaralyq jıyndarda jasaǵan baıandamalary, Prezıdent Jarlyqtary, shet memleket basshylarynyń elimizdi Táýelsiz memleket retinde tanýy týraly hattary qoıylǵan.
Láıla EDILQYZY,
«Egemen Qazaqstan».
Sýretterdi túsirgen Orynbaı Balmurat
