Búgin QR Premer-Mınıstriniń birinshi orynbasary Asqar Mamın jumys saparymen Mańǵystaý oblysyna baryp, Quryq portyndaǵy parom kesheniniń qurylys barysyn tekserdi, dep habarlaıdy primeminister.kz.
«Nurly jol» baǵdarlamasynyń jobasyn «Qazaqstan temir joly» UK» AQ júzege asyrady.
QR birinshi vıse-premerine Quryq portynyń alǵashqy iske qosý kesheni nysandarynyń qorytyndylaýshy kezeńi týraly málimet berildi.
Ersaı stansasynan bastap Quryq portyna deıin uzyndyǵy 12 shaqyrymnan astam kirme temirjol ýchaskesinde relsshpaldy sharbaqtar tolyq tóseldi. Joldy qıyrshyq tastarmen ballasttaý jumystary aıaqtaldy. 4,3 mln m3 kólemde jer oıyp alyndy. Sondaı-aq, 400 myń tonna kólemde být tasynan batys qorǵaý molyn salý jumystary atqaryldy. Porttyń kireberis kanaly men akvatorııanyń 525 myń m3 topyraq kóleminde túpti tereńdetý jumystary aıaqtaldy.
10 kVt syrtqy elektrmen jabdyqtaý jelileri salyndy. Kótermeli-ótpeli kópir salý jumystary júrgizilip jatyr. Quryq portynyń alǵashqy iske qosý kesheni nysandary aǵymdaǵy jyldyń sońyna deıin paıdalanýǵa beriledi.
«Quryq portyndaǵy parom kesheni Transkaspıı halyqaralyq kólik baǵdarynyń kólik-logıstıkalyq júıesiniń mańyzdy bólimi bolyp tabylady. Ol Qazaqstannyń tranzıttik-kólik áleýetin damytýǵa qýatty serpin beredi jáne «Jańa Jibek joly» jobasyn júzege asyrýǵa septigin tıgizedi», - dedi A. Mamın.
Quryq portyndaǵy parom kesheni táýligine bes paromǵa qyzmet kórsetedi, osylaısha jylyna 4 mln tonna kólemde júkterdi óńdeýdi qamtamasyz etedi.
