«Astana» velokomandasy Frýmǵa qarsy Fýlsangty daıyndaýda

«Astana» velokomandasynyń sapynda óner kórsetip júrgen danııalyq Iаkob Fýlsang Týr de Fransta ózin komanda kapıtany retinde synap kórýi ábden múmkin. Bul týraly sportshy La Gazzetta dello Sport basylymyna bergen suhbatynda jarııa etti. Kóptegen velosport mamandarynyń paıymdaýynsha 31 jasar Iаkobtyń sońǵy jyldardaǵy jınaǵan tájirıbesi óte mol, ol grand týrlardyń birinde «Astana» lıderi retinde shyǵýǵa tolyqtaı daıyn. Iаkobtyń ózi bul týraly bylaı deıdi. «Men buryn ózimniń kúshime sene almaıtyn edim. Biraq Rıo Olımpıadasynyń kúmis júldegeri atanǵannan keıin, barlyǵy ózgerdi. Bul nátıje men úshin óte mańyzdy. Osyndaı kórsetkishter meniń úlken jeńisterge laıyqty ekendigimdi dáleldeıdi. Árıne, kelesi jyly basty oıym Týr de Frans. Men 2013 jyly sol saıysty jalpy esepte jetinshi orynmen aıaqtaǵan edim. Qazir ózim de, tájirıbem de ósti. Sondyqtan budan da jaqsy nátıje kórsete alamyn dep oılaımyn. Jáne de komandanyń maǵan degen senimin aqtaý qajet» dedi danııalyq veloshabandoz. Sonymen qatar, Vınchenso Nıbalıdiń kelesi maýsymda bolmaıtyny komandaǵa oń áserin tıgizedi degen oıyn jetkizdi. Iаkobtyń aıtýy boıynsha, Nıbalıdiń ketýi «Astana Pro team» sapyndaǵy basqa velosportshylarǵa óz sheberlikterin tolyqtaı ashýǵa múmkindik beredi. Osyǵan deıin «Astana Pro team» komandasynyń basshylyǵy Djıro de Italııa men Ispanııa Výeltasynda Fabıo Arý, al Týr de Fransta Iаkob Fýlsang pen kolýmbııalyq Mıgel Anhel Lopes komanda kapıtandary bolatyndyǵyn málimdegen. Bı-bolat Seıtaq