Alakól kelesi shomylý maýsymynda demalýshylar men týrısterdi abattandyrylǵan jaǵalaýymen qarsy almaq. Osy maqsatta Shyǵys Qazaqstan oblysynyń ákimdigi Alakól demalys aımaǵyn damytýǵa 500 mıllıon teńge qarjy bólýge sheshim qabyldady. Atalǵan qarjyǵa 2017 jyly kól jaǵalaýyna aparatyn joldarǵa ortasha jóndeý jumystary júrgizilip, jaǵajaılar kóriktendiriletin bolady. Joba boıynsha kól jaǵalaýynda saıabaq ashylyp, balalardyń sporttyq jáne attraksıondy oıyn alańdary salynbaq. Sonymen qatar, avtobeket aýmaǵynda avtoturaq jasalady.
Bıyl oblys ákimi Danıal Ahmetov óńirlik týrızmdi damytý aıasynda Alakól jaǵalaýyn damytýǵa erekshe nazar aýdaryp otyr. О́ńir basshysynyń tapsyrmasy boıynsha arnaıy jumys toby qurylyp, jaǵalaýdaǵy sanıtarlyq-epıdemıologııalyq jáne órtke qarsy qaýipsizdik talaptaryn teksergen bolatyn. Bul rette jaǵalaýdaǵy kásipkerlik nysandarynyń kóptegen talaptar údesinen shyǵa almaı otyrǵany anyqtaldy. Sondaı-aq 80 nysanda sáýlet jáne qala qurylysy talaptarynyń oryndalmaǵany belgili boldy. Tekseris qorytyndylary boıynsha, Úrjar aýdanynyń ákimdigi kásipkerlermen kelesi demalys maýsymy bastalǵanǵa deıin kemshilikterdi joıý týraly memorandým bekitken edi. Bul kelisimge sáıkes, kásipkerler qyzmet kórsetýdi zań talaptaryna sáıkes júrgizýmen birge ıelikterindegi nysandardy abattandyryp, demalýshylarǵa qolaıly jaǵdaı jasaýǵa ýaǵdalasqan.
Eń bastysy, Alakól jaǵalaýynda týrızmdi damytý máselesin keshendi sheshý maqsatynda tıisti ınfraqurylymdy qura otyryp, demalys aımaǵyn abattandyrýdyń jobasy daıyndaldy. О́tken aptanyń sońynda oblys ákimi D.Ahmetovtiń tóraǵalyǵymen Úrjar aýdanynda ótken arnaıy keńestiń barysynda bul joba kópshilik nazaryna usynylyp, bekitildi. Jańa jobaǵa sáıkes, kelesi jyly Alakólge aparatyn joldarǵa ortasha jóndeý jumystary júrgizilip, jaǵalaý men jaǵajaılar abattandyrylady, saıabaq ashylyp, sport jáne attraksıondy oıyn alańdary salynady. Sonymen qatar, avtobeket aýmaǵy abattandyrylyp, 200 oryndyq avtoturaq jasaqtalmaq. Úrjar aýdanynyń ákimi Serik Zaınýldın atalǵan jumystardyń 2017 jyldyń 1 shildesine deıin aıaqtalatynyn jetkizdi.
– Aýdandaǵy azamattardyń óz mindetterin oryndap, Alakóldiń mańaıyn abattandyrý boıynsha tıisti jumystardy atqaratynyna, demalýǵa kelgen adamdarǵa qolaıly jaǵdaı jasaıtynyna senim bildiremin. Bul rette Alakóldi Shyǵys Qazaqstannyń maqtanýǵa turarlyqtaı kórikti aımaǵy etýge alǵash ret bıýdjetten arnaıy qarjy bólinýde, – dedi keńesti qorytyndylaǵan D.Ahmetov.
Dýman ANASh,
"Egemen Qazaqstan"
Shyǵys Qazaqstan oblysy,
Úrjar aýdany.
