Basqosýǵa Qazaqstan halqy Assambleıasy Tóraǵasynyń orynbasary – Hatshylyq meńgerýshisi D.Myńbaı, Parlament Májilisiniń depýtattary, Assambleıa músheleri, memlekettik organdardyń, dıplomatııalyq korpýstyń, etno-mádenı birlestikterdiń ókilderi, «EKSPO-2017» kórmesine kelgen sheteldik qonaqtar, ǵylymı jáne zııaly qaýym ókilderi, halyqtyq qoldanbaly óner sheberleri qatysty, dep habarlaıdy Aqordanyń resmı saıty.
Is-sharalar Ulttyq mýzeıde bastaý aldy. Onda EKSPO-2017 kórmesi ótkiziletin kezeńde qoǵamdyq kelisim men jalpyulttyq birliktiń qazaqstandyq modeli jan-jaqty tanystyrylady.
Memlekettik hatshy sóılegen sózinde Nursultan Nazarbaevtyń qoǵamdyq kelisim men jalpyulttyq birliktiń qazaqstandyq modeli kóp etnosty qoǵamnyń ıntegrasııalanýyna qatysty salmaqty saıasattyń jalpyǵa tanylǵan etalony bolǵanyn atap ótti.
– Elimizdiń Konstıtýsııasy násildik, ulttyq, dinı jáne áleýmettik ereksheligine qaramastan, barlyq azamattar quqyqtarynyń teńdigine kepildik beredi jáne qorǵaıdy, - dedi Gúlshara Ábdiqalyqova.
Memlekettik hatshy búginde Qazaqstanda 100-den astam etnos pen 18 konfessııa ókilderi beıbit ári tatý ómir súrip otyrǵanyn aıtty.
Sondaı-aq is-shara qonaqtary buqaralyq aqparat quraldarynyń etno-mádenı birlestikter týraly arnaýly kórmesimen, halyqtyq qoldanbaly óner sheberleri buıymdarynyń jármeńkesimen, «Kıiz úı – Eldiń otaýy» konsept-modýlimen, qazaqtyń ulttyq taǵamdary jónindegi sheberlik sabaqtarymen tanysty.
Budan bólek, Gúlshara Ábdiqalyqova men forýmǵa qatysýshylar EKSPO saıabaǵy aýmaǵynda ornalasqan Qazaqstan halqy Assambleıasynyń Beıbitshilik pen kelisim alleıasynyń saltanatty ashylý rásimine qatysty.
Onda etnomádenı birlestikterdiń jáne shyǵarmashyl jastardyń teatrlandyrylǵan sherýi, halyqtyq qoldanbaly óner sheberleriniń «Sheberler aýyly» kórme-jármeńkesi, «Alǵa, Qazaqstan!» fleshmoby ótti.
Forýmnyń sońynda Memlekettik hatshy beıbitshilik jáne kelisim energııasy ǵalamshardaǵy eń taza ári ıgilikti energııa ekenin atap ótti.
Beıbitshilik pen kelisim alleıasy arqyly júrip ótken ár adam qonaqjaı ári keń peıil qazaq jeriniń jylýyna bólenetin bolsyn degen tilek aıtyldy.
