«TOKYO ROPE MFG., CO. LTD» basqarýshy kompanııasynyń sheshimi negizinde Rýmıl Taýfıkov «Tokyo Rope Almaty» kompanııasy dırektorlar keńesiniń tóraǵasy bolyp taǵaıyndaldy. Habarlamada aıtylǵanyndaı, ol jańa qyzmetinde kompanııaǵa tikeleı basshylyq jasaýmen qatar ońtústik astananyń Indýstrıaldy aımaǵyndaǵy Almaty metız zaýyty qurylysy jobasyn jáne zaýyt ónimderin jaqyn jáne shetelderge, sonyń ishinde Saýd Arabııasyna, О́zbekstanǵa, Qyrǵyzstan men Reseıge jáne Norvegııaǵa jetkizý baǵdarlamasyn júzege asyrýmen aınalysady.
Almaty qalasy ákiminiń baspasóz qyzmeti málim etkendeı, metaldan jasalǵan asa tózimdi temir torlar men panelder shyǵaratyn «Tokyo Rope Almaty» atty alǵashqy zaýyt ótken jyldyń qarasha aıynda Qazaqstan Respýblıkasynyń Prezıdenti Nursultan Nazarbaevtyń qatysýymen ashylǵan edi. Memleket basshysy Japonııa Premer-mınıstri Sındzo Abemen kezdesý barysynda taraptar ekijaqty yntymaqtastyqty nyǵaıtýǵa ýaǵdaslaqan bolatyn.
Memleket basshysynyń Japonııaǵa saparynan soń Almatyda japondyq iskerlik klýby men japondyq ındýstrıaldy park quryldy, al shilde aıynda japondyq «Tokyo Rope Manufacturing» transulttyq kompanııasy ınjenerlik júıelerdi qorǵaıtyn ónim shyǵaratyn Almatydaǵy ekinshi joǵarytehnologııaly zaýyt salynatyn jerge kapsýlany qaqqan bolatyn.
«Tokyo Rope Manufacturing» dırektorlar keńesiniń tóraǵasy Shıgeto Tanakı bul zaýyttyń Japonııadan ózge elde balamasy joq erekshe kásiporyn ekenin aıtqan bolatyn. Indýstrıaldy aımaqtaǵy 4 gektar jerge ornalasatyn zaýytty iske qosý úshin sheteldik kompanııa jumsaıtyn ınvestısııa kólemi 3,6 mlrd. teńgeni quraıdy.Munda joǵary sapaly metall trostar, taýly jáne karerli jumystar úshin bolattan jasalyp, qorǵasynmen qaptalǵan torlar, býrosvaılyq ankeralar jáne basqa da ónimder shyǵarylady. О́nimderde qazaqstandyq mazmunnyń úlesi bolǵandyqtan ózindik quny da birshama arzan. О́ndiris kólemi boıynsha jylyna 17 myń tonna ónim shyǵarylady. Zaýytty iske qosý 2018 jylǵa josparlanǵan.
«Tokyo Rope» kompanııasynyń negizi osydan 130 jyl buryn qalanǵan, bolat arqandar shyǵarý boıynsha álemde jetekshi ról atqarady, sonymen qatar selge, daýylǵa, túrli tas kóshkinderine qarsy túratyn nysandardy salýdy jobalaýmen, montajdaýmen de aınalysady. Búgingi kúni álemdegi iri 20 kópirdiń 12-si (Bosfor buǵazynyń, Sýes kanalynyń boıyndaǵy, Gonkongtegi álemdegi eń uzyn Stoýnkaters kópirleri) japondyq metall arqandaryn paıdalanyp salynǵan. Japonııada shyǵatyn árbir tórtinshi avtokólikte «Tokyo Rope» ónimderi bar. Kompanııa jedel lıfterge jáne ınjenerlik qorǵanysqa qajet joǵary sapaly ónimder shyǵarýmen de tanymal.
Esterińizge sala keteıik, jańa taǵaıyndaýǵa deıin Rýmıl Taýfıkov Almaty qalasy ákiminiń orynbasary qyzmetinde boldy. Ol Jolaýshy kóligi jáne avtomobıl joldary basqarmasyna basshylyq jasaı otyryp, qalanyń kólik qurylymyn reformalaýdy belsendi júrgizdi, jalaqy jónindegi qaryzdy 1 mlrd. teńgege azaıtyp, jumyspen qamtý jáne mıgrasııa máselesimen aınalysty. Tótenshe jaǵdaılar departamentimen birge tótenshe jaǵdaılardyń aldyn alý jáne joıý, morendi kólderdiń taıazdanýyn boldyrmaý barysynda qomaqty jumystar júrgizdi, halyqty jumyspen qamtý jáne áleýmettik baǵdarlamalardy júzege asyrý boıynsha utymdy sheshimder qabyldady, densaýlyq saqtaý basqarmasyna basshylyq jasaı otyryp, mindetti medısınalyq saqtandyrý júıesin engizýge jáne basqada mańyzdy sharalardy júzege asyrýǵa tikeleı yqpal etti.
